ప్రజాశక్తి-రామభద్రపురం : ఫ్రెండ్లీ పోలీసింగ్‌ విధానానికే ప్రథమ ప్రాధాన్యత ఇవ్వాలని బొబ్బిలి డిఎస్‌పి శ్రీధర్‌ ఆదేశించారు. మంగళవారం స్థానిక పోలీస్‌ స్టేషన్‌లో ప్రత్యేక తనిఖీలు నిర్వహించారు. ఈ సందర్భంగా ఆయన మాట్లాడుతూ బైపాస్‌ జంక్షన్‌ వద్ద నిర్వహిస్తున్న చెక్‌ పోస్ట్‌ సత్ఫలితాలు ఇస్తుందన్నారు. ఇతర రాష్ట్రాల నుంచి వచ్చే మాదకద్రవ్య రవాణా పూర్తి అదుపులో ఉందన్నారు. నిరంతర గస్తీ ఏర్పాట్ల వల్ల డ్రంక్‌ అండ్‌ డ్రైవ్‌, త్రిబుల్‌ డ్రైవింగ్‌ అదుపులోకి వచ్చిందన్నారు. విజిబుల్‌ పోలీసింగ్‌ విధానం ద్వారా దోపిడీ, దొంగతనాలు, ర్యాగింగ్‌ వంటి వాటిపై ప్రత్యేక నిఘా ఉంచామన్నారు. బహిరంగ, దాబా, హోటల్‌, లాడ్జిల్లో మద్యం విక్రయాలు, మద్యపానానికి అనుమతిస్తే వాటి నిర్వాహకులపై కేసులు నమోదు చేస్తామని హెచ్చరించారు. మూడు రోడ్ల జంక్షన్‌ వద్ద ట్రాఫిక్‌ నియంత్రణకు పటిష్ట చర్యలు చేపట్టామని, దీనికి వ్యాపారులు, ప్రజలు సహకరి ంచాలని కోరారు. నక్సల్స్‌ కదలికలు పూర్తిగా కనుమరు గయ్యాయని ఒక ప్రశ్నకు సమాధానంగా చెప్పారు. సమావేశంలో సిఐ తిరుమలరావు, ఎస్‌ఐ సురేంద్రనాయుడు పాల్గొన్నారు.
వంగర : మహిళలపై నేరాలు జరగకుండా వారికి రక్షణగా ఉండేందుకు ప్రత్యేక దృష్టిసారిస్తామని రాజాం రూరల్‌ సిఐ ఎస్‌.శ్రీనివాస్‌ అన్నారు. వంగర పోలీస్‌ స్టేషన్‌ను మంగళవారం ఆయన సందర్శించారు. అన్ని రూములను క్షుణ్ణంగా పరిశీలించి, రికార్డులు తనిఖీ చేశారు. ఎస్‌ఐ ఆర్‌.జనార్ధనరావు, పోలీస్‌ సిబ్బందితో సమావేశం నిర్వహించి సమస్యలు అడిగి తెలుసుకున్నారు. విధుల నిర్వహణపై సూచనలు ఇచ్చారు. అనంతరం ఆయన విలేకరులతో మాట్లాడుతూ బాలికల పైన, మహిళలపైన నేరాలకు పాల్పడితే కఠిన చర్యలు తప్పవని హెచ్చరించారు. ప్రభుత్వం ప్రవేశపెట్టిన దిశ యాప్‌పై గ్రామాల్లో, పాఠశాలలు, కళాశాలల్లో అవగాహన కార్యక్రమాలు నిర్వహిస్తామన్నారు. పేకాట, కోడిపందాలు వంటివి నిర్వహిస్తే ఉపేక్షించేది లేదన్నారు. కార్యక్రమంలో హెచ్‌సిలు డి.రాములు, నాయుడు, పోలీస్‌ సిబ్బంది పాల్గొన్నారు.
