ప్రజాశక్తి-విజయనగరం : జాతీయ స్థాయిలో అమలవుతున్న పధకాలను సక్రమంగా ప్రజలకు చేరువయ్యేలా అధికారులు సహకరించాలని పార్లమెంట్‌ సభ్యులు బెల్లాన చంద్ర శేఖర్‌ పేర్కొన్నారు. జిల్లా అభివృద్ధి కోఆర్డినేషన్‌ అండ్‌ మానిటరింగ్‌ కమిటీ సమావేశం శుక్రవారం కలెక్టరేట్‌ ఆడిటోరియంలో ఎమ్‌పి అధ్యక్షతన నిర్వహించారు. సంసద్‌ ఆదర్శ గ్రామ యోజన పథకం కింద అమలవుతున్న కేంద్ర ప్రభుత్వ పథకాలపై జిల్లా కలెక్టర్‌ నాగలక్ష్మితో కలసి సమీక్షించారు. గడప గడప కు మన ప్రభుత్వం బిల్లులను వెంటనే అప్‌లోడ్‌ చేయాలని, పనులు వేగంగా జరిగేల చూడాలని ఇంజనీరింగ్‌ అధికారులకు సూచించారు. జల జీవన్‌ మిషన్‌ కింద ఇంటింటికి కుళాయి కార్యక్రమం శత శాతం పూర్తి చేయాలన్నారు. అర్హత ఉండి పింఛన్‌ అందని వారికి వెంటనే అందించేందుకు చర్యలు తీసుకోవాలన్నారు. జాతీయ రహదారుల అభివద్ధి లో భాగంగా వేస్తున్న రోడ్లకు సంబంధించి లారీ లు గ్రామాల్లో ఎక్కువగా తిరగడం వలన గ్రామ రహదారులు పాడైపోతున్నాయని, ముఖ్యంగా పూసపాటి రేగ వద్ద, గజపతి నగరం వద్ద ఇలాంటి పరిస్థితి ఉందని, అందుకు తగు చర్యలు తీసుకోవాలని ప్రజా ప్రతినిధులు కోరారు. కలెక్టర్‌ స్పందిస్తూ నేషనల్‌ హై వే అథారిటీ వారికీ ఆదేశాలు జరీ చేస్తామని తెలిపారు.
సంసద్‌ ఆదర్శ గ్రామ యోజన (సాగి) పధకం కింద జిల్లాలో ఎంపిక చేసిన 5 గ్రామాల్లో చేపడుతున్న కార్యక్రమాలపై అధికారులను ఎంపి ప్రశ్నించారు. కలెక్టర్‌ నాగలక్ష్మి మాట్లాడుతూ ఆయా మండలాల్లో మండల ప్రత్యేకాధికారులు వారానికి ఒకసారి ఆ గ్రామాలను సందర్శించి సర్పంచ్‌ లు, ఇతర ప్రజా ప్రతినిధులతో కలసి చర్చించాలని సూచించారు. ఆదర్శ గ్రామంగా మారడానికి కావలసిన అన్ని రకాల వసతులను, అవసరాలను గుర్తించాలని సూచించారు. సమావేశంలో ఎంఎల్‌సి ఇందుకూరు రఘురాజు, సహాయ కలెక్టర్‌ వెంకట త్రివినాగ్‌, జెడ్‌పి సిఇఒ రాజ్‌ కుమార్‌, జిల్లా అధికారులు, సర్పంచ్‌ లు, ఎంపిపిలు పాల్గొన్నారు.
