ప్రజాశక్తి - బొబ్బిలి : ప్రజాస్వామ్యంలో ప్రశ్నిస్తే మోడీ ప్రభుత్వం సహించలేకపోతోందని సిఐటియు జిల్లా అధ్యక్షులు పి.శంకరరావు ఆగ్రహం వ్యక్తంచేశారు. న్లూస్‌క్లిక్‌ జర్నలిస్టులపై ఉపా చట్టాన్ని మోపి, జైల్లోపెట్టడాన్ని వ్యతిరేకిస్తూ పట్టణంలోని కోరాడ వీధిలో సిఐటియు ఆధ్వర్యాన మంగళవారం నిరసన చేపట్టారు. ఈ సందర్భంగా ఆయన మాట్లాడుతూ మణిపూర్‌ హింసలో ఉదాసీనతకు కేంద్రంలో బిజెపి ప్రభుత్వం కారణమని ప్రపంచానికి తెలియజేసిన న్యూస్‌ క్లిక్‌పై దాడులు చేయించడం దారుణమన్నారు. కేంద్రంలోని బిజెపి ప్రభుత్వం ప్రజాస్వామ్య హక్కులను కాలరాస్తోందని ఆగ్రహం వ్యక్తంచేశారు. ప్రతిపక్ష పార్టీలను సైతం తప్పుడు కేసులు బనాయించి లొంగదీసుకుంటోందని మండిపడ్డారు. పాలకులు చేస్తున్న తప్పులను ప్రశ్నించేవారిని దేశద్రోహం కేసులు, బెయిల్‌ రాని సెక్షన్లు పెట్టి కక్ష సాధింపు చర్యలకు పాల్పడుతోందని విరుచుకుపడ్డారు. ఇది ప్రజాస్వామ్యానికి పెను ప్రమాదమని ఆందోళన వ్యక్తంచేశారు. బిజెపి దుర్మార్గాన్ని ప్రజలందరూ తీవ్రంగా ఖండించాలని కోరారు. కార్యక్రమంలో యూనియన్‌ నాయకులు బి.యుగంధర్‌, జి.గౌరీ, జి.శంకర్రావు కార్మికులు పాల్గొన్నారు.
