ప్రజాశక్తి - నెల్లిమర్ల : జ్యూట్‌ యాజమాన్యం పిఎఫ్‌ బకాయిలు చెల్లించకపోతే విధులు బహిష్కరిస్తామని జ్యుట్‌ వర్కర్స్‌ యూనియన్‌ నాయకులు కిల్లంపల్లి రామారావు హెచ్చరించారు. పిఎఫ్‌ బకాయిలు చెల్లించాలని కోరుతూ సోమవారం కార్మికులు స్ధానిక జ్యూట్‌మిల్‌ గేటు వద్ద ఏ, బి షిఫ్ట్‌ కార్మికులు 1,30గంటల నుంచి 3 గంటల వరకు ఆందోళన నిర్వహించారు. ఈ సందర్భంగా జ్యూట్‌ మిల్లు వర్కర్స్‌ యూనియన్‌ నాయకులు కిల్లంపల్లి రామారావు కార్మికుల నుద్దేశించి మాట్లడుతూ జ్యూట్‌ యాజమాన్యం పిఎఫ్‌ బకాయిలు సంబంధిత అధికారులకు చెల్లించకపోతే విధులు బహిష్కరిస్తామని హెచ్చరించారు. యాజమాన్యం ఇంత వరకు పిఎఫ్‌ బకాయిలు చెల్లించక పోవడంతో కార్మికులు పింఛన్‌ సౌకర్యం పొందలేక ఇబ్బందులు పడుతున్నారన్నారు. రిటైర్డ్‌ కార్మికులకు గ్రాడ్యుటీ బకాయిలు, జ్యూట్‌ యాజమాన్యం రుణంగా తీసుకున్న 5,10,18 రూపాయలు తిరిగి కార్మికులకు చెల్లించక పోయినా సరిపెట్టుకోని పనులు చేస్తుంటే పిఎఫ్‌ బకాయిలు చెల్లించక పోవడం దుర్మార్గమన్నారు. కాగా పిఎఫ్‌ బకాయిలు చెల్లించేవరకు ఆందోళన విరమించడం జరగదని చెప్పడంతో జ్యూట్‌ యాజమాన్యం దిగివచ్చి 2022 డిసెంబర్‌ వరకు పిఎఫ్‌ బకాయిలు చెల్లిస్తామని చెప్పడంతో కార్మికులు ఆందోళన విరమించారు. ఈ కార్యక్రమంలో పలువురు కార్మికుల పాల్గొన్నారు.
కాంట్రాక్టు కార్మికుల సమస్యలు పరిష్కరించాలి
శంగవరపుకోట: సిఐటియు యూనియన్‌ ఆధ్వర్యంలో పట్టణంలోని ఏరియా ఆసుపత్రిలో కాంట్రాక్ట్‌ పద్ధతిలో పనిచేస్తున్న సెక్యూరిటీ గార్డ్స్‌, శానిటేషన్‌ వర్కర్స్‌ సమస్యలు పరిష్కారం చేయాలని ఆసుపత్రి సూపరిండెంట్‌ నీలాకు సోమవారం వినతి పత్రం అందజేశారు. ఈ సందర్భంగా సిఐటియు జిల్లా కార్యదర్శి మద్దిల రమణ మాట్లాడుతూ 4 నెలల పాటు 16 మంది వర్కర్స్‌ తో కాంట్రాక్టర్స్‌ వెట్టి చాకిరీ చేయించుకుంటున్నారని సకాలంలో జీతాలు చెల్లించకపోవడం వల్ల కార్మికులు ఇబ్బందులకు గురవుతున్నారని అన్నారు. అందరూ పేదకుటుంబాల నుంచి వచ్చిన వారేనని వీరంతా కాంట్రాక్టర్‌ ఇచ్చిన జీతం పై ఆధారపడి తమ కుటుంబాలను పోషించుకుంటున్నారని ఇప్పటికైనా బకాయి జీతాలు ఈనెల 30 తేదీ లోపు చెల్లించాలన్నారు. వేతనాలు చెల్లించకపోతే వచ్చే నెల ఒకటి నుంచి 6వ తేదీ వరకూ విధులు బహిష్కరించి సమ్మెలోకి వెళ్తామని హెచ్చరించారు. జిల్లాలో ఉన్న మహారాజా ఆసుపత్రిలో పనిచేస్తున్న వర్కర్లకు నాలుగు నెలల క్రితం వేతనాలు పెంచారని, అలాగే ఎస్‌కోట ఏరియా హాస్పిటల్‌ లో పనిచేస్తున్న కాంట్రాక్ట్‌ వర్కర్‌ లందరికీ వేతనాలు పెంచాలన్నారు. ఈ కార్యక్రమంలో డి గణేష్‌, ఎం శ్రీను, బి ఈశ్వరి, వి రామచంద్ర, వై అప్పారావు, డి గౌరీ, ఎం రేణుక, ఎం కృష్ణ, వై సన్యాసమ్మ తదితరులు పాల్గొన్నారు.
