ప్రజాశక్తి - విజయనగరం ప్రతినిధి : జిల్లాలో మెజార్టీ అసైన్డ్‌ భూములు భూస్వాములు, ధనికులు, రాజకీయ నాయకుల చెరలో ఉన్నాయి. ప్రస్తుతం అసైన్డ్‌ ల్యాండ్స్‌ రెగ్యులైజేషన్‌ ద్వారా దళితులకన్నా వాటిని ఆక్రమించుకోవడం లేదా నిబంధనలకు విరుద్ధంగా వారి నుంచి కొనుగోలు చేసినవారికే లబ్ధి చేకూర నుంది. భవిష్యత్తులో ఆర్థికంగా వెనుకబడిన దళితులకు భూములు అప్పగించి, వారి స్వావలంభనకు ప్రయత్నించేందుకు అవకాశం లేకుండా పోతుందనడంలో సందేహం లేదని పలువురు
అభిప్రాయ పడుతున్నారు.
20ఏళ్ల క్రితం నుంచి దళితుల సాగులోవున్న అసైన్డ్‌ భూములను రెగ్యులర్‌ చేసేందుకు ప్రభుత్వం నిర్ణయించిన విషయం విధితమే. ఈ నేపథ్యంలో జిల్లాలో భూముల వివరాలు సేకరించే పనిలో రెవెన్యూ యంత్రాంగం ఉంది. ముఖ్యంగా విఆర్‌ఒ, ఆర్‌ఐ స్థాయిలో గ్రామాల వారీగా అసైన్డ్‌ భూమి సాగుదారులు ఎవరు? వారికి ఏ సంవత్సరంలో ప్రభుత్వం అప్పగించింది? ముఖ్యంగా 2003కు మునుపు ఇచ్చిన భూమి ఎంత? వాటిని అసైన్డ్‌ పట్టాదారులే సాగు చేస్తున్నారా? లేక వారి వారసులు సాగు చేస్తున్నారా? అప్పట్లో ఇచ్చిన భూమంతా వీరిచేతిలోనే ఉందా? లేక ఇతరులెవరైనా సాగుచేస్తున్నారా? అన్న కోణంలో భూమి వివరాలు సేకరిస్తున్నామని రెవెన్యూ అధికారులు చెబుతున్నారు. విజయనగరం జిల్లాలో ఇప్పటి వరకు 55వేల నుంచి 60వేల ఎకరాలు వరకు అసైన్డ్‌ భూములు ఉన్నాయని అధికారులు అంచనాగా చెబుతున్నారు. 2003 నాటి ముందు ఇచ్చిన భూములు 33,946 ఎకరాలు ఉన్నట్టుగా గుర్తించారు. ఇందులో అత్యధికంగా బొబ్బిలి రెవెన్యూ డివిజన్లో సుమారు 15,837 మంది దళితులకు 15,258.82 ఎకరాలు ఇచ్చినట్టు రెవెన్యూ రికార్డులు చెపుతున్నాయి. బాడంగి మండలంలో 2905 దళిత కుటుంబాలకు 2772.18 ఎకరాలు, బొబ్బిలిలో 3590 కుటుంబాలకు 4113 ఎకరాలు, మెంటాడలో 175 కుటుంబాలకు 411.99 ఎకరాలు, తెర్లాంలో 3394 కుటుంబాలకు 2246.54 ఎకరాలు, రామభద్రపురంలో 2220 కుటుంబాలకు 2762.10 ఎకరాలు, దత్తిరాజేరులో 1269 కుటుంబాలకు 1278.66 ఎకరాలు, గజపతి నగరంలో 2286 కుటుంబాలకు 1674.27ఎకరాలు చొప్పున అసైన్డ్‌ భూమి ప్రభుత్వం ఇచ్చింది. మిగిలిన భూమి విజయనగరం, చీపురుపల్లి డివిజన్ల పరిధిలో ఉంది. దాదాపు ఈ భూముల్లో ఎక్కువ భాగం స్థానిక పెత్తందారులు, రాజకీయ నాయకులు, కొంతమంది ప్రజాప్రతినిధుల చేతుల్లో ఉన్నాయి. వీటిని రెగ్యులర్‌ చేసేందుకు ప్రభుత్వం కసరత్తు చేస్తున్న నేపథ్యంలో ఆక్రమిత పెత్తందారులంతా సంబంధిత దళితులను లోబరుచుకునే పనిలోవున్నారు. 'ఎంతోకొంతకు అప్పట్లో మీ వద్ద నుంచి కొన్నాం కాబట్టి, ప్రస్తుతం మీ పేరున రెగ్యులర్‌ చేయించుకుని, ఆ వెంటనే మా పేరున రిజిస్ట్రేషన్‌ చేయాలి' అంటూ దళితులపై ఒత్తిడి చేస్తున్నట్టు సమాచారం. వెనుకాడితే అప్పట్లో రాసుకున్న తెల్లకాగితాలు, బాండ్‌పేపర్లను బయటకు తీస్తామంటూ హెచ్చరిస్తున్నారు. కొనుగోలు కాకుండా మాయమాటలతో భూములను ఆక్రమించుకున్న పెత్తందారులు, రాజకీయ నాయకులు దళితులను మచ్చిక చేసుకుంటున్నారు. అవసరమైతే ఎంతోకొంత ఇచ్చేస్తామని అదిరింపులు, బెదిరింపులు, బుజ్జగింపులు చేస్తున్నారు. ఇటువంటి పరిస్థితి బొబ్బిలి, వేపాడ, మెంటాడ, గంట్యాడ తదితర మండలాల్లో ఎక్కువగా కనిపిస్తోంది.
దళితులకు అన్యాయం
అసైన్డ్‌ భూముల రెగ్యులర్‌ చేయడమంటే వాటిని ఆమ్రించుకున్నవారికి కట్టబెట్టడమే. చాలా వరకు అసైన్డ్‌ భూములు రాజకీయ నాయకులు, భూస్వా ములు, పెత్తందారుల ఆధీనంలో వున్నాయి. ఎంతోకొంత ముట్టజెప్పి చాలా కాలం నుంచీ సాగు చేసుకుంటున్నారు. ఈ నేపథ్యంలో దళితులకు రిజిస్ట్రేషన్‌ కాగానే, వారి నుంచి సాగుదారులైన పెత్తందారులకు ట్రాన్స్‌ఫర్‌ అయ్యే అవకాశాలే ఎక్కువగా ఉంటాయి. భవిష్యత్తులో దళితులు, ఆర్థికంగా వెనుకబడినవారికి న్యాయం చేయాలంటే సాగుపట్టాలను అదే పద్ధతిలో కొనసాగించాలి.
బుద్ధరాజు రాంబాబు
ఎపి రైతు సంఘం జిల్లా అధ్యక్షులు
