ప్రజాశక్తి-బొబ్బిలి : నవరత్నాలు-పేదలందరికీ ఇల్లు పథకంతో పేదల సొంతింటి కల సాకారం అవుతుందని ఎంపి బెల్లాన చంద్రశేఖర్‌, ఎమ్మెల్యే శంబంగి వెంకట చిన అప్పలనాయుడు అన్నారు. పేదల కోసం పట్టణంలోని ఐటిఐ కాలనీ వద్ద ప్రభుత్వం ఏర్పాటు చేసిన జగనన్న కాలనీలో గురువారం సామూహిక గృహ ప్రవేశాలు చేశారు.
కాకినాడ జిల్లా సామర్లకోటలో ముఖ్యమంత్రి వైఎస్‌ జగన్‌ మోహనరెడ్డి ఈ కార్యక్రమాన్ని లాంఛనంగా ప్రారంభించారు. ముఖ్యమంత్రి సందేశాన్ని ప్రత్యక్ష ప్రసారం ద్వారా తిలకించిన అనంతరం, ఇక్కడ ఐటిఐ కాలనీవద్ద నిర్మించిన జగనన్న కాలనీలో జిల్లా స్థాయి గహప్రవేశ కార్యక్రమాన్ని నిర్వహించారు. ఈ సందర్భంగా శంబంగి మాట్లాడుతూ పేదల సొంతింటి కలను సాకారం చేసేందుకు ఈ పథకం అమలు చేస్తున్నట్లు చెప్పారు. గత ప్రభుత్వ హయాంలో వార్డుకు, గ్రామానికి ఒకటి,రెండు ఇల్లు మంజూరు చేస్తే వైసిపి హయాంలో అర్హులందరికీ ఇళ్లు మంజూరు చేసినట్లు చెప్పారు. నియోజకవర్గంలో 10,964 ఇళ్లు మంజూరు చేస్తే 6415 ఇళ్ల నిర్మాణాలు పూర్తయ్యాయని అన్నారు. బొబ్బిలి నియోజకవర్గం రాజుల 15ఏళ్ల పాలనలో అభివృద్ధికి దూరంగా ఉందన్నారు. జగనన్న కాలనీ, ఇందిరమ్మ కాలనీలో రోడ్లు, కాలువలు, విద్యుత్‌, తాగునీటి సౌకర్యం ఏర్పాటు చేస్తున్నట్లు చెప్పారు. గ్రామాల్లో తాగునీరు సంపూర్ణంగా అందించేందుకు జలజీవన్‌ మిషన్‌ పథకంతో ఇంటింటి కుళాయిలు వేస్తున్నామన్నారు. పట్టణంలో ఇంటింటి కుళాయిలు వేసేందుకు సువర్ణముఖి నది నుంచి మున్సిపాలిటీకి నీరందించేందుకు మంచినీటి పథకానికి రూ.93.62కోట్లు మంజూరు అయ్యాయన్నారు. ఎంపి బెల్లాన చంద్రశేఖర్‌ మాట్లాడుతూ రాష్ట్రంలో 30లక్షల ఇళ్లు మంజూరు చేస్తే ఐదు లక్షల ఇళ్లు పూర్తి చేసిన ఘనత వైసిపి ప్రభుత్వానికే దక్కుతుందన్నారు. ప్రజలకు ఇంటి వద్దకే వైద్యం అందించేందుకు జగనన్న ఆరోగ్య సురక్ష అమలు చేస్తున్నట్లు చెప్పారు. అంగవైకల్యం లేకుండా పిల్లలకు జన్మనిచ్చే విధంగా ప్రభుత్వ ఆసుపత్రిలో టిఫా స్కాన్‌ సౌకర్యం కల్పించినట్లు చెప్పారు. కలెక్టర్‌ ఎస్‌.నాగలక్ష్మి మాట్లాడుతూ జగనన్న కాలనీలో మౌలిక సౌకర్యాలు కల్పిస్తున్నట్లు చెప్పారు. ఉచితంగా విద్యుత్‌ కనెక్షన్‌ ప్రభుత్వం ఇస్తుందన్నారు. లబ్ధిదారులు ఇంటి నిర్మాణానికి ముందుకు రావాలని కోరారు. మున్సిపల్‌ చైర్మన్‌ సావు వెంకట మురళీకష్ణ మాట్లాడుతూ రాజకీయాలకు అతీతంగా సంక్షేమ పథకాలు అందిస్తున్నామన్నారు.కార్యక్రమంలో రాజాం ఎమ్మెల్యే కంబాల జోగులు, ఆర్‌డిఒ పి.శేషశైలజ, హౌసింగ్‌ పీడీ వి.శ్రీనివాస్‌, మున్సిపల్‌ కమిషనర్‌ ఎస్‌.శ్రీనివాసరావు, జెడ్‌పిటిసి సభ్యులు, వైసిపి నాయకులు, అధికారులు పాల్గొన్నారు.
