ప్రజాశక్తి -పిఎం పాలెం : చంద్రంపాలెం పాఠశాలలో పదో తరగతి చదువుతున్న విద్యార్థుల ఇళ్లకు వెళ్లి డిఇఒ ఎల్‌.చంద్రకళ సోమవారం రాత్రి 9 గంటల ప్రాంతంలో ఆకస్మిక తనిఖీ చేశారు. పిఎం.పాలెం సమీపంలో ఉన్న ఆర్‌హెచ్‌ కాలనీ, మధురవాడ బాలుర సంక్షేమ హాస్టల్‌లో ఆమె తనిఖీలను నిర్వహించారు. ఈ సందర్భంగా ఆమె మాట్లాడుతూ, పదో తరగతి పరీక్షలకు మరో నెల రోజులు మాత్రమే ఉన్నందున పిల్లలు చదువులు పట్ల శ్రద్ధ వహిస్తున్నారా లేదా అని తెలుసుకునేందుకు ఈ తనిఖీలు నిర్వహిస్తున్నామని తెలిపారు. ఇప్పటికే ఉపాధ్యాయులు బృందాలుగా విద్యార్థుల ఇళ్లకు వెళ్లి తనిఖీలు నిర్వహిస్తున్నారని తెలిపారు. రోజుకొక పాఠశాలకు సంబంధించి విద్యార్థుల ఇళ్లకు వెళ్లి తనిఖీ చేస్తామని తెలిపారు. సమయాన్ని వృథా చేసుకోకుండా విద్యార్థులు సద్వినియోగం చేసుకునేలా తగు జాగ్రత్తలను విద్యార్థులకు, వారి తల్లిదండ్రులకు వివరించారు. ఈ కార్యక్రమంలో డిప్యూటీ డిఇఒ గౌరీశంకర్‌, చంద్రంపాలెం పాఠశాల ప్రధానోపాధ్యాయులు ఎం రాజబాబు పాల్గొన్నారు.
