ప్రజాశక్తి-విజయనగరం టౌన్‌ : రాష్ట్ర ప్రభుత్వం సిపిఎస్‌, జిపిఎస్‌లను రద్దు చేసి ఒపిఎస్‌ను అమలు చేయాలని, ఉపాధ్యాయ సమస్యలు పరిష్కరించాలని డిమాండ్‌చేస్తూ ఈనెల 29న విజయవాడలో ధర్నా చేయనున్నట్లు ఎపిటిఎఫ్‌ (1938) రాష్ట్ర గౌరవ అధ్యక్షులు ఎ.సదాశివరావు తెలిపారు. బుధవారం జిల్లా శాఖ కార్యాలయంలో జిల్లా అధ్యక్షులు డి.ఈశ్వరరావు అధ్యక్షత ఏర్పాటు చేసిన జిల్లా కార్యవర్గ సమావేశం లో ఆయన మాట్లాడుతూ రాష్ట్ర ప్రభుత్వం ఉద్యోగ,ఉపాధ్యాయులకు సిపి ఎస్‌ ను రద్దు చేస్తామని చెప్పి మోసం చేసిందన్నారు. కొత్తగా జిపి ఎస్‌ తీసుకొచ్చి ఉద్యోగులను మరో మోసం చేస్తోందన్నారు. తక్షణమే జిపి ఎస్‌ను రద్దు చేసి, ఒపిఎస్‌ అమలు చేయాలని, ప్రతి నెలా ఒకటో తేదీన వేతనాలు చెల్లించాలని, 2003 డిఎస్సీ వారికి పాత పెన్షన్‌ అమలు చేయాలని, బకాయి పడ్డ డిఎ, పిఎఫ్‌, ఎపి జిఎల్‌ఐ బకాయిలు చెల్లించాలని డిమాండ్‌ చేశారు. వీటి సాధనకు చేపడుతున్న ధర్నాలో ఉపాధ్యాయులు అధిక సంఖ్యలో పాల్గొనాలని కోరారు.
