ప్రజాశక్తి-విజయనగరం టౌన్‌ : ప్రభుత్వం ప్రకటించిన గ్వారంటీ పెన్షన్‌ విధానం (జిపిఎస్‌) కు బదులుగా సిపిఎస్‌ ఉద్యోగులందరికీ పాత పెన్షన్‌ విధానం పునరుద్దరించాలని, 2004 సెప్టెంబర్‌ 1కు ముందు నియామక ప్రక్రియ పూర్తయిన ఉద్యోగులందరికీ పాత పెన్షన్‌ విధానం అమలు చేయాలని కోరుతూ కలెక్టరేట్‌ జ్యోతిరావు పూలే విగ్రహం వద్ద ఈనెల 19 నుంచి నిరవధిక నిరాహార దీక్షలు చేయునున్నట్లు యుటిఎఫ్‌ జిల్లా అధ్యక్ష కార్యదర్శులు రమేష్‌ చంద్ర పట్నాయక్‌, జెఎవిఅర్‌కె ఈశ్వరరావు తెలిపారు. మంగళవారం యుటిఎఫ్‌ కార్యాలయంలో జరిగిన విలేకరుల సమావేశంలో వారు దీక్షలకు సంబంధించిన పోస్టర్‌ను ఆవిష్కరించారు. అనంతరం మాట్లాడుతూ ప్రభుత్వం ఇచ్చిన హమీలను అమలు చేయాలని, ఎటువంటి కంట్రిబ్యూషన్‌ లేని పాత పెన్షన్‌ విధానమే ఉద్యోగులు అందరికీ శ్రేయస్కరమని అన్నారు. సిపిఎస్‌, జిపిఎస్‌ విధానాలను రద్దుచేసి ఒపిఎస్‌ విధానాన్ని పునరుద్దరించాలని, కేంద్ర ప్రభుత్వం ఇచ్చిన మెమో 57ను అనుసరించి 2004 ముందు నియామక ప్రక్రియ పూర్తయిన వారికి ఒపిఎస్‌ వర్తింపజేయాలని డిమాండ్‌ చేశారు. ఎటువంటి హమీ ఇవ్వకుండానే రాజస్తాన్‌, ఛత్తీస్‌ఘడ్‌ రాష్ట్రాలు, హమీ ఇచ్చి ఢిల్లీ, పంజాబ్‌, హిమాచల్‌ ప్రదేశ్‌, కర్ణాటక వంటి రాష్ట్రాలలో ఒపిఎస్‌ అమలుకు చర్యలు తీసుకుంటున్నారని తెలిపారు. కేంద్రం నుంచి ఎటువంటి ఇబ్బందులు వచ్చినా రాష్ట్రంలో పనిచేస్తున్న ఉద్యోగ, ఉపాధ్యాయ, కార్మిక వర్గాలన్నీ రాష్ట్ర ప్రభుత్వం పక్షాన కేంద్రంతో పారాడటానికి సిద్దంగా ఉన్నామని తెలిపారు. ఈనెల 18 నుండి రాష్ట్ర కేంద్రంలోను, 19 నుండి జిల్లా కేంద్రం విజయనగరంలోను, 20వ తేదీ నుంచి ఎస్‌.కోట, గజపతినగరం నెల్లిమర్ల, బొబ్బిలి, చీపురుపల్లి, రాజాం తాలూకా కేంద్రాల్లోను నిరవధిక దీక్షలు ప్రారంభిస్తామని తెలిపారు. ఉపాధ్యాయులు, ఉద్యోగులు అధిక సంఖ్యలో హజరై ఉద్యమాన్ని విజయవంతం చేయాలని కోరారు. సమావేశంలో యుటిఎఫ్‌ సీనియర్‌ నాయకులు డి.రాము, కె.శ్రీనివాసరావు, జిల్లా కార్యదర్శులు కె.ప్రసాదరావు, ఎన్‌.సత్యనారాయణ, సిహెచ్‌ తిరుపతినాయుడు, జిల్లా సిపిఎస్‌ కన్వీనర్‌ పి. రాంప్రసాద్‌ పాల్గొన్నారు.
