ప్రజాశక్తి-విజయనగరంకోట : టిడిపి అధినేత చంద్రబాబు అరెస్టు నిరసిస్తూ ఆపార్టీ నాయకులు, కార్యకర్తలు వినూత్న కార్యక్రమం చేపట్టారు. న్యాయానికి సంకెళ్లు పేరిట నిరసనలతో హోరెత్తించారు. చేతికి తాళ్లు, రిబ్బన్లతో సంకెళ్లు వేసుకొని ఆదివారం రాత్రి 7గంటల నుంచి 7.0 5గంటల వరకు నిరసన తెలిపారు. టిడిపి జిల్లా కార్యాలయం అశోక్‌బంగ్లా వద్ద నాయకులు, కార్యకర్తలు సంకెళ్లు వేసుకొని నిరసన తెలిపారు. ఈ సందర్భంగా పార్టీ జిల్లా ప్రధానకార్యదర్శి ఐవిపి రాజు మాట్లాడుతూ చట్టానికి కళ్లు లేవు అన్నట్లు ఈరాష్ట్ర ప్రభుత్వం వ్యవహరిస్తుందన్నారు. 37 రోజులుగా చంద్రబాబును జైల్లో పెట్టి కాలయాపన చేసి ఇబ్బంది పెడుతున్నారని మండిపడ్డారు. చంద్రబాబుకు మెరుగైన వైద్యం అందించాలని కోరారు. కార్యక్రమంలో పట్టణ అధ్యక్షులు ప్రసాదుల లక్ష్మీ వరప్రసాద్‌, కార్యదర్శి బంగారు బాబు, మండల పార్టీ అధ్యక్షులు బొద్దల నర్సింగరావు, కార్యదర్శి గంటా పోలి నాయుడు, వేచలపు శ్రీనివాసరావు, కార్యాలయ కార్యదర్శి వర్మ రాజు, విజ్జపు ప్రసాద్‌, రొంగల రామారావు, భాష, మహేష్‌, విజయనగరం నియోజకవర్గ నాయకులు పాల్గొన్నారు. కోరుకొండలో జనసేన నాయకులు గురాన అయ్యలు ఆధ్వర్యాన న్యాయానికి సంకెళ్లు కార్యక్రమం నిర్వహించారు. చంద్రన్నకు అండగా రైతన్నలు కార్యక్రమాన్ని టిడిపి సీనియర్‌ నాయకులు గణపతినీడి శ్రీనివాసరావు ఆధ్వర్యాన నిర్వహించారు. టిడిపి పార్లమెంటరీ అధ్యక్షులు కిమిడి నాగార్జున, లోక్‌సత్తాపార్టీ రాష్ట్ర అధ్యక్షులు భీశెట్టి బాబ్జీ, మాజీ మంత్రి పడాల అరుణ, సిపిఐ రాష్ట్ర కార్యవర్గసభ్యులు పి.కామేశ్వరరావు మాట్లాడారు. టిడిపి జిల్లా ప్రధాన కార్యదర్శి ఐవిపి రాజు, జిల్లా న్యాయవిభాగం అధ్యక్షులు ఉపాధ్యాయుల రవిశంకర్‌, మాజీ ఎంపిపి కంది చంద్రశేఖర్‌, సిపిఐ జిల్లా కార్యదర్శి ఒమ్మి రమణ, జిల్లా వ్యవసాయ కార్మిక సంఘం ప్రధాన కార్యదర్శి పురం అప్పారావు, గేదెల ఆదిబాబు, మైలిపల్లి పైడిరాజు, తుంపిల్లి రమణ, గొలగాని సురేంద్ర తదిరులు పాల్గొన్నారు.
బొబ్బిలి : చంద్రబాబు అరెస్టుకు నిరసనగా కోటలో టిడిపి నియోజకవర్గ ఇన్‌ఛార్జి బేబినాయన చేతులకు తాడుతో సంకెళ్లు వేసుకొని నిరసన తెలిపారు. చంద్రబాబు ధర్మ పోరాటానికి మద్దతు తెలుపుతూ ఈ కార్యక్రమం చేపట్టినట్లు ఆయన తెలిపారు.
బాడంగి : బాడంగిలో మాజీ ఎమ్మెల్యే తెంటు లక్ష్మునాయుడు ఆద్వర్యాన చేతులకు తాడుతో సంకెళ్లు వేసుకుని నిరసన చేపట్టారు. కార్యక్రమంలో టిడిపి నాయకులు, కార్యకర్తలు పాల్గొన్నారు.
నెల్లిమర్ల : న్యాయానికి సంకెళ్లు వేసిన పిచ్చి జగన్‌ నియంతృత్వ పోకడలను దేశమంతా తెలియజెప్పాలని టిడిపి నాయకులు అన్నారు. నియోజకవర్గ టిడిపి ఇంఛార్జి కర్రోతు బంగార్రాజు ఆధ్వర్యంలో చేతులకు రిబ్బను కట్టుకొని నిరసన తెలిపారు. కార్యక్రమంలో జిల్లా పార్టీ సీనియర్‌ నాయకులు సువ్వాడ రవి శేఖర్‌, మండల పార్టీ అధ్యక్షులు కడగల ఆనంద్‌ కుమార్‌, నగర పంచాయతీ పార్టీ అధ్యక్షులు బైరెడ్డి లీలావతి , పార్లమెంట్‌ కార్యదర్శి లెంకఅప్పలనాయుడు, అట్టాడ శ్రీధర్‌ పాల్గొన్నారు.
బొబ్బిలి : పైశాచిక ఆనందం కోసం టిడిపి అధినేత చంద్రబాబును వైసిపి ప్రభుత్వం అరెస్టు చేసిందని టిడిపి నియోజకవర్గ ఇన్‌ఛార్జి బేబినాయన అన్నారు. కోటలో ఆదివారం విలేకరులతో ఆయన మాట్లాడుతూ అన్యాయంగా అరెస్టు అయిన చంద్రబాబు సతీమణి భువనేశ్వరి, లోకేష్‌, బ్రాహ్మణి, బాలకృష్ణను మాజీ ఎమ్మెల్యే తెంటు రాజాతో కలిసి సంఘీభావం తెలిపామన్నారు. చంద్రబాబును అన్యాయంగా, రాజ్యాంగ, ప్రజాస్వామ్య విలువలకు తూట్లు పొడిచి అరెస్టు చేశారన్నారు.
గరివిడి : టిడిపి అధినేత చంద్రబాబు 40 ఏళ్ల రాజకీయ జీవితంలో ఎవరికీ హాని తలపెట్టలేదని టిడిపి పార్లమెంటరీ నియోజకవర్గ అధ్యక్షులు కిమిడి నాగార్జున తెలిపారు. ఆదివారం చీపురుపల్లిలో విలేకరుల సమావేశం నిర్వహించారు. ఈ సందర్భంగా నాగార్జున మాట్లాడుతూ చంద్రబాబును జైల్లోనే ఉంచాలని కుటుంబ సభ్యులు కోరుకుంటున్నట్లు మంత్రి బొత్స అనడం తగదన్నారు. బొత్స కుటుంబ సభ్యులు అలానే అనుకుంటారా? అని నిలదీశారు. సమావేశంలో టిడిపి మండల అధ్యక్షులు రౌతు, రెస్కో మాజీ చైర్మన్‌ దన్నాన రామచంద్రుడు, తాడ్డే సన్యాసినాయుడు, ముల్లు రమణ,శ నపతి శ్రీనివాస రావు, గవిడి నాగరాజు, రౌతు నారాయణ రావు పాల్గొన్నారు.
వేపాడ: పాలనలో వైసిపి ప్రభుత్వం పూర్తిగా విఫలమైందని టిడిపి మండల అధ్యక్షులు గొంప వెంకటరావు అన్నారు. వేపాడలో ఆదివారం ఆయన విలేకరులతో మాట్లాడారు. ప్రజాధనంతో గ్రామ సచివాలయాలు, రైతు భరోసా కేంద్రాలు, వెల్‌నెస్‌ కేంద్రాలు ఏర్పాటు చేసి, సేవలను అందుబాటులోకి తీసుకొస్తామని ప్రకటించారని గుర్తుచేశారు. నాలుగేళ్లు గడిచినా నేటికీ అతీగతీ లేకుండా పోయిందన్నారు. సగానికి పైగా రైతు బజార్‌ కేంద్రాల పనులు పూర్తి కాలేదన్నారు. వెల్‌నెస్‌ సెంటర్లకు నిధులు మంజూరు చేయకపోవడంతో నేటికీ పురోగతి సాధించలేదన్నారు. పూర్తిస్థాయిలో రైతులకు అవసరమైన ఎరువులను అందించలేదని చెప్పారు.
