నువ్వెళ్లే దారుల్లో
ముళ్లూరాళ్లూ వుంటే ఏరేసిపో
వెనుకవచ్చే వారికి మంచిదారి ఏర్పడుతుంది !
నువ్వెళ్లే దారుల్లో
దేవుళ్లు కనిపిస్తారు దండం పెట్టు పెట్టకపో
దాహార్తులు కనిపిస్తే మాత్రం వారిగొంతు తడిపిపో!
నువ్వెళ్లే దారుల్లో
నీడలుంటే చెట్లు నాటినవారికి కృతజ్ఞతలుగా
నీవూ ఓ మొక్క నాటిపో మరొకరికి నీడౌతుంది !
నువ్వెళ్లే దారుల్లో
సైంధవ రేఖలెన్నో అడ్డుపడినా అర్జునుడిలా సాగిపో
పాశుపతాస్త్రంలాంటి వీరులెందరో వెంబడిస్తారు!
నువ్వెళ్లే దారుల్లో
విజయపతాకాల్ని మైలురాళ్లుగా పాతిపో
రాబోవుతరపు బాటసారులు నీలా విజేతలవుతారు!
నువ్వెళ్లే దారుల్లో
ఎడారి ఎదురైనా గుండెని గోదారిలా పరచిపో
నీకోసం కురిసే కన్నీటి కుసుమాలతో పూదారవుతుంది!
నువ్వెళ్లే దారుల్లో
కారుచీకట్లున్నా చిరుదివ్వెను వెలిగించిపో
పాదచారి కళ్లల్లో కోటికాగడాలు పుట్టుకొస్తాయి !
నువ్వెళ్లే దారుల్లో
కొన్ని అక్షరాల గుత్తులను నీగుర్తుగా విత్తిపో
కలకాలం చరిత్రలో మనిషిగా నిలచిపోతావు !
సురేంద్ర రొడ్డ
94915 23570
