ప్రజాశక్తి-బొబ్బిలి : నకిలీ ఇళ్ల పట్టాలపై రెవెన్యూ అధికారులు దూకుడు పెంచారు. మున్సిపాలిటీలోని ఇందిరమ్మ కాలనీలో ఇళ్ల స్థలాలను కొంతమంది అక్రమార్కులు ఆక్రమించేసి నకిలీ పట్టాలు తయారు చేసి అమ్ముకుని సొమ్ము చేసుకుంటున్నారు. నకిలీ ఇళ్ల పట్టాలపై 'ప్రజాశక్తి'లో కథనాలు రావడంతో ఆర్‌డిఒ పి.శేషశైలజ స్పందించి సమగ్ర దర్యాప్తు చేయాలని తహశీల్దార్‌ డోల రాజేశ్వరరావును ఆదేశించారు. దీంతో విఆర్‌ఒలతో నాలుగు బృందాలు ఏర్పాటు చేసి దర్యాప్తు ప్రారంభించారు. ఖాళీగా ఉన్న స్థలాల్లో ఆక్రమణ చేస్తే చర్యలు తీసుకుంటామని బోర్డులను ఏర్పాటు చేశారు. ఖాళీ స్థలాల్లో బోర్డులు ఏర్పాటు చేయడంతో ఇకపై ఆక్రమణలను అడ్డుకోవచ్చని తహశీల్దార్‌ రాజేశ్వరరావు చెప్పారు. దర్యాప్తులో నకిలీ పట్టాల గుట్టు బయట పడటంతో అక్రమార్కుల్లో గుబులు మొదలైంది. నకిలీ పట్టాలను గుర్తించేందుకు, ప్రభుత్వ ఇళ్ల స్థలాలు ఆక్రమణకు గురికాకుండా వివరాలు ఇచ్చి సహకరించాలని మున్సిపల్‌ కమిషనర్‌ను కోరినట్లు తహశీల్దార్‌ చెప్పారు. నూతనంగా నిర్మించే ఇళ్ల పత్రాలు తమకు పంపించి ఒరిజినల్‌ పట్టా, కాదో నిర్దారణ చేసుకున్న తర్వాత మాత్రమే నిర్మాణాలకు అనుమతులు ఇవ్వాలని కోరినట్లు తెలిపారు. ప్రభుత్వ స్థలాలు ఆక్రమణకు గురికాకుండా చర్యలు తీసుకుంటామని తహశీల్దార్‌ రాజేశ్వరరావు చెప్పారు.
