ప్రజాశక్తి-విజయనగరం : జిల్లాలోని విభిన్నప్రతిభావంతులకు అవసరమైన ఉపకరణాలను కేంద్ర ప్రభుత్వ సంస్థ అలిమ్‌ కో సహాయంతో పంపిణీ చేసేందుకు ఏర్పాట్లు పూర్తయ్యాయి. నగరంలోని రాజీవ్‌ స్టేడియంలో శనివారం ఉదయం 10 గంటలకు నిర్వహించే కార్యక్రమంలో జిల్లాలోని 434 మంది విభిన్నప్రతిభా వంతులకు ఒక్కొక్కరికి రూ.42 వేలు విలువైన బ్యాటరీతో నడిచే మోటరైజ్డ్‌ మూడు చక్రాల సైకిళ్లను కేంద్ర సామాజిక సాధికారిత సహాయ మంత్రి ఎ.నారాయణ స్వామి అందజేయ నున్నారు. దీంతోపాటు విజయనగరం అసెంబ్లీ నియోజకవర్గ పరిధిలో గుర్తించిన 310 మందికి ఉపకరణాలు అందజేసేందుకు ఏర్పాట్లు చేశారు. జిల్లాలో ఈ ఏడాది ఏప్రిల్‌ నెలలో నియోజకవర్గాల వారీగా నిర్వహించిగ గుర్తింపు శిబిరాల ద్వారా 2337 మందికి ఉపకరణాలు అందజేసేందుకు గుర్తించగా వారందరికీ ఆయా నియోజకవర్గాల్లో పంపిణీకి కూడా ఏర్పాట్లు చేస్తున్నారు.
కేంద్ర మంత్రి పర్యటన నేపథ్యంలో రాజీవ్‌ స్టేడియంలో ఉపకరణాల పంపిణీ ఏర్పాట్లపై జాయింట్‌ కలెక్టర్‌ మయూర్‌ అశోక్‌ శుక్రవారం స్టేడియంను సందర్శించారు. వికలాంగులు కూర్చొనేందుకు అవసరమైన సౌకర్యాలు కల్పించాలని, వచ్చిన లబ్దిదారులు, వారి సహాయకులకు భోజన వసతి సమకూర్చాలని ఆదేశించారు. వీటిని ఆయా మండలాలకు పంపించేందుకు రవాణా ఏర్పాట్లు చేయాలని రవాణాశాఖ అధికారులను జె.సి. ఆదేశించారు. పంపిణీ కోసం అవసరమైన సహాయ సిబ్బందిని, సహకారాలను మున్సిపల్‌ కార్పొరేషన్‌ ద్వారా అందించాలని మునిసిపల్‌ కమిషనర్‌ శ్రీరాములు నాయుడుకు సూచించారు. ఆయన వెంట మెప్మా పీడీ సుధాకర్‌, విభిన్నప్రతిభావంతుల శాఖ ఎడి జగదీష్‌, డిసిహెచ్‌ఎస్‌ గౌరీశంకర్‌, డిఎస్‌ఒ మధుసూధన్‌, సెట్విజ్‌ సిఇఒ రాంగోపాల్‌ తదితరులు పాల్గొన్నారు.
