ప్రజాశక్తి-విజయనగరం, బొబ్బిలి : పేదలందరికీ ఇళ్లు కార్యక్రమం కింద జిల్లాలో మంజూరైన వాటిలో తొలివిడతగా పూర్తయిన గృహాలను గురువారం ముఖ్యమంత్రి వై.ఎస్‌.జగన్‌ మోహన్‌ రెడ్డి వర్చ్యువల్‌గా ప్రారంభించ నున్నారు. సామర్లకోట నుంచి రాష్ట్రంలో నిర్మాణం పూర్తిచేసుకున్న 7 లక్షల ఇళ్లను ముఖ్యమంత్రి ప్రారంభిస్తున్నారు. అందులో జిల్లాలోని గ్రామీణ, పట్టణ ప్రాంతాల్లో వివిధ గృహనిర్మాణ పథకాల కింద నిర్మించిన 41,499 ఇళ్లలో గృహప్రవేశాలు జరగనున్నాయి. జిల్లాలో పిఎంఎవై - వైఎస్‌ఆర్‌ అర్బన్‌ కింద నిర్మించిన 39,348 ఇళ్లలో, పి.ఎంఎవై - వైఎస్‌ఆర్‌ గ్రామీణ్‌ కింద నిర్మించిన 39 ఇళ్లలో, 2112 టిడ్కో ఇళ్లలో నేడు సామూహిక గృహప్రవేశాలు జరగనున్నట్టు కలెక్టర్‌ ఎస్‌.నాగలక్ష్మి వెల్లడించారు. బొబ్బిలి పట్టణంలోని ఐటిఐ కాలనీలో గురువారం జిల్లాస్థాయిలో సామూహిక గృహప్రవేశాల కార్యక్రమంలో జిల్లాకు చెందిన ప్రజాప్రతినిధులు పాల్గొని నిర్మాణం పూర్తయిన ఇళ్లను ప్రారంభించనున్నట్టు చెప్పారు.
జిల్లాలో పేదలందరికీ ఇళ్లు పథకం కింద ఒక్కో ఇంటి నిర్మాణానికి రూ.1.80 లక్షల చొప్పున ఇళ్ల నిర్మాణం కోసం ఇప్పటికే రూ.657.10 కోట్లు లబ్ధిదారులకు చెల్లించామని పీడీ వి.శ్రీనివాస్‌ వివరించారు.
సంక్రాంతికి 10 లక్షల ఇళ్ల నిర్మాణాలే లక్ష్యం
శృంగవరపుకోట : రాష్ట్ర వ్యాప్తంగా జగనన్న కాలనీలలో సంక్రాంతి నాటికి పది లక్షల ఇళ్ల నిర్మాణాలు పూర్తి చేయడమే లక్ష్యమని గృహ నిర్మాణ శాఖ ప్రిన్సిపల్‌ సెక్రటరీ దివాన్‌ మైదీన్‌ అన్నారు. పట్టణంలోని పుణ్యగిరి రోడ్డులో జగనన్న కాలనీలో నిర్మాణాలను ఆయన పరిశీలించారు. ఈ సందర్భంగా ఆయన మాట్లాడుతూ రాష్ట్రంలో ఇప్పటివరకు 5.34 లక్షల ఇళ్ల నిర్మాణాలు పూర్తయినట్లు చెప్పారు. వీటిని సిఎం జగన్‌ ప్రారంభిస్తారని తెలిపారు. కాలనీల్లో 84 వేల కోట్లతో రోడ్డు, కరెంట్‌, మంచినీరు వంటి మౌలిక సదుపాయాలు కల్పిస్తున్నట్లు తెలిపారు. ఇంత పెద్ద ఎత్తున ఊర్లు నిర్మించడం మహా యజ్ఞం లాంటిదని, కాలనీలు పూర్తయితే యజ్ఞ ఫలితం లభిస్తుందని అన్నారు. కార్యక్రమంలో తహశీల్దార్‌ శ్రీనివాసరావు, హౌసింగ్‌ ఎఇ చినబాబు, విఆర్‌ఒ కన్నయ్య తదితరులు పాల్గొన్నారు.
