ప్రజాశక్తి - జామి : 'మాకు అధికారం వస్తే... సమస్యను ఇట్టే పరిష్కరిస్తా'మని ప్రగల్బాలు పలికే ఏలికలు.. అందలం ఎక్కాక, సమస్యను పట్టించుకోకపోవడం ఆనవాయితీగా మారింది. మండల కేంద్రమైన జామి మేజర్‌ పంచాయతీలో రోజూవారీ మార్కెట్‌ను పరిశీలిస్తే... ఆ మాట నిజమే అనేక తప్పదు. రోజువారీ మార్కెట్‌ కష్టాలు జనాన్ని ముప్పుతిప్పలు పెడుతున్నాయి. ఉదయం 7 నుంచి 9 గంటల వరకు ఆ రహదారి గుండా వెళ్లాలంటే, నరకయాతన పడాల్సిందే. మార్కెట్‌ నిర్వహణకు స్థలం లేక నడి రోడ్డుపైనే మార్కెట్‌ నిర్వహణతోనే సమస్య. ప్రతిరోజూ ఉదయం జామి- ఎస్‌.కోట రహదారి ప్రయాణమంటేనే భయపడాల్సిన పరిస్థితి. పాఠశాలకు వెళ్లే విద్యార్థులు, ఆఫీసులు వెళ్లే ఉద్యోగులు, వాహన చోదకులు అష్టకష్టాలు పడుతున్న పరిస్థితి. ఇంత జరుగుతున్నా పంచాయతీ అధికారులు, పాలకవర్గం పట్టించుకోని దుస్థితి. పోనీ పోలీసులైన ట్రాఫిక్‌ నియంత్రణ చేస్తారంటే... వారిది మూణ్నాళ్ల ముచ్చటే. ఇలా వైసిపి అధికారం చేపట్టి దాదాపు నాలుగున్నరేళ్లు పూర్తికావస్తున్నా... సమస్య పరిష్కారం కాలేదు. గతంలో వారపు సంత స్థలాన్ని అభివృద్ధి చేసి, మార్కెట్‌ నిర్వహణ మారుస్తామని ప్రణాళికలు రూపొందించినా... అవి మాటలకే పరిమితమయ్యాయి.
జామి మేజరు పంచాయతీ ఆధ్వర్యంలో రోజువారి మార్కెట్‌ నిర్వహణ సాగుతోంది. ప్రతి ఏటా పంచాయతీ వేలం ధ్వారా కాంట్రాక్టరును ఎంపిక చేసి, మార్కెట్‌ నిర్వహణ చేపడుతున్నారు. తద్వారా పంచాయతీకి ఆదాయం వస్తుంది. అయితే ఇక్కడ మార్కెట్‌ నిర్వహణకు పంచాయతీ స్థలం చూపించాలి. కానీ పంచాయతీ స్థలం కేటాయించక పోవడంతో కాంట్రాక్టరు రహదారిపైనే మార్కెట్‌ నిర్వహిస్తున్నారు. ధీంతో రోజూ ఉదయం 7 నుంచి 9 గంటల వరకు రహదారిపై తీవ్ర ట్రాఫిక్‌ అంతరాయంతో జనం నానా ఇక్కట్లు పడుతున్నారు. ఆర్‌టిసి బస్సులు సైతం గంటల తరబడి నిలిచిపోవాల్సిన పరిస్థితి. ఇటీవల విశాఖ జిల్లా సబ్బవరం నుంచి రాయపూర్‌ జాతీయ రహదారి నిర్మాణంలో భాగంగా భారీ వాహనాలు ఎక్కువైన నేపథ్యంలో ట్రాఫిక్‌ అంతరాయానికి ఇక అంతేలేని పరిస్థితి.
పట్టించుకోని పంచాయతీ
ప్రతి ఏటా మార్చిలో రోజువారి మార్కెట్‌కు పంచాయతీ వేలం వేసి, నిర్వహణ బాధ్యత అప్పగిస్తారు. గతంలో జామి గ్రామానికి చెందిన న్యాయవాది బూసర్ల రమణారావు ఆధ్వర్యంలో కొంతమంది గ్రామస్తులు పంచాయతీ అధికారులతోపాటు ఎంపిడిఒ, ఇఒపిఆర్‌డికి వినతి పత్రాలు అందజేసి, మార్కెట్‌ నిర్వహణకు తగిన స్థలాన్ని కేటాయించి, సమస్యను పరిష్కరించాలని కోరారు. అప్పట్లో ఎంపిడిఒ సతీష్‌ కూడా స్పందించి, మార్కెట్‌ స్థలం మార్పుపై తక్షణమే చర్యలు తీసికోవాలని ఆదేశించారు. దీంతో పంచాయతీ ఇఒ గ్రామంలోని సంత ప్రాంగణం శుభ్రం చేసి, మార్కెట్‌ మార్పు చేస్తామని కొద్ది రోజులు హడావుడి చేసి, చేతులు దులుపుకున్న పరిస్థితి. అనంతరం పత్రికల్లో కథనాలు రావడంతో ఎంపిపి, జెడ్‌పిటిసి సభ్యులు స్పందించారు. మండల, జిల్లా పరిషత్తు ఉమ్మడి నిధులతో వారపు సంత అభివృద్ధి చేస్తామని చెప్పారు. దీంతో సమస్యకు శాశ్వత పరిష్కారం వస్తుందని ప్రజలు భావించారు. కానీ అది కార్యరూపం దాల్చలేదు. అప్పటి నుంచి రోజూ కష్టాలు తప్పడం లేదు.
పంచాయతీదే బాధ్యత
వాస్తవానికి రోడ్డుపై అర నిమిషం అంతరాయం ఏర్పడినా, పోలీసులు అక్కడకు చేరుకుని సమస్య పరిష్కరిస్తారు. సమస్యల పరిష్కారం కోసం ప్రజా సంఘాలు ఆందోళన చేసినప్పుడు పోలీసులు పది నిమిషాలు కూడా సమయం ఇవ్వకుండా అడ్డుకుని రోడ్డు క్లియర్‌ చేస్తారు. కానీ జామి రోజువారి మార్కెట్‌తో రహదారి నిర్బంధం జరిగినా పోలీసులు చూసీ చూడనట్లు వదిలేస్తున్నారు. వాస్తవానికి రోజూవారీ మార్కెట్‌ వల్ల ఆదాయం పొందుతున్న పంచాయతీ బాధ్యత వహించాలి. కానీ వారికి ఈ సమస్య పట్టడం లేదు. ఈ నేపథ్యంలోనే జనం ఆందోళన వ్యక్తం చేస్తున్నారు. ఎటువంటి ప్రమాదం జరిగినా దానికి పంచాయతీ పెద్దలు, అధికారులు బాధ్యత వహించక తప్పదంటూ ఆవేదన వ్యక్తం చేస్తున్నారు. ఇప్పటికైనా మార్కెట్‌ సమస్య పరిష్కారంతోపాటు అప్పటి వరకు ట్రాఫిక్‌ నియంత్రణ చేయించాల్సిన బాధ్యత పంచాయతీనే తీసుకోవాలని ప్రజలు డిమాండ్‌ చేస్తున్నారు.
