మట్టి సలసల మసిలి..
కోపాగ్నితో ఎగిసి పిడికిలెత్తింది !
కర్రు కొలిమిలో ఎర్రగా కాలి..
నిరసనల చురకల వాత పెట్టింది !
కొడవలి కోపతాపంతో చట్టాల్లోని...
కలుపును కోసే తెగువ చూపింది !
గడ్డపార భీకరంగా గర్జించి...
కార్పొరేటును కాటేయ చూసింది !
ఎడ్లబండి ఎగిసిపడి...
రోడ్డుకు అడ్డుపడి కన్నెర్ర చేసింది !
కర్షక లోకసంద్రం ఏకమై..
నాగేటి సాళ్లల్లో గింజై రగిలింది !
రైతు గొంతు రౌద్రంతో...
ఢిల్లీ పీఠం దద్దరిల్లింది !
ఏకతాటిపై భారతం...
రైతుపక్షపాతియై
హోరెత్తింది !
నేలతల్లి నిశ్శబ్ద నినాదం...
అధికారాన్ని నిలదీసింది !
నాగేటి సాళ్లు సాగి...
మౌనాన్ని చీల్చి మాట
మొలిచింది !
భారతమంతా బందుతో..
అష్టదిగ్బంధం దిగ్విజయమైంది !
కలుపు చట్టాలపై సమరశంఖంతో..
పల్లె పట్నం జనం ఏకమయ్యింది !
అన్నదాతకు అండదండగా..
భారతమాత నిలబడి గళం కలిపింది !
నేను సైతం అంటూ...
పంట పైరు రైతెంట నడిచింది !
ఒక్కటై నిలిచిన భారతం..
విష చట్టాల సంకెళ్లు ఛేదిస్తోంది !
- డా. బుర్ర మధుసూదన్‌ రెడ్డి
9949700037
