ప్రజాశక్తి - భోగాపురం : మత్స్యకారులను ప్రభుత్వం అన్ని విధాలుగా ఆదుకుంటుందని ఎమ్మెల్యే బడ్డుకొండ అప్పలనాయుడు అన్నారు. భోగాపురం గ్రామంలోని సింగిల్‌ చెరువులో స్వదేశీ మత్స్యకారులకు ఉచితంగా అందజేసిన చేపపిల్లలను ఆయన చేతులు మీదుగా సోమవారం విడిచిపెట్టారు. ఈ సందర్భంగా అక్కడ జరిగిన సమావేశంలో ఆయన మాట్లాడారు. స్వదేశి, విదేశి మత్స్యకారులను ప్రభుత్వం ఎంతో ఆదుకుందన్నారు. కాని మండలంలోని ముక్కాం గ్రామానికి చెందిన మత్స్యకారులు ప్రతి ఎన్నికల్లోను ఇంకా తెదేపాకే మొగ్గు చూపుతున్నారన్నారు. ఈసారి అలా జరక్కుండా చూడాలని మత్స్యకార నాయకులకు సూచించారు. భోగాపురం మత్స్య పారిశ్రామిక సహకార సంఘానికి రూ.1.50లక్షల విలువైన 84వేలు చేప పిల్లలను ఉచితంగా అందజేయడం చాలా గొప్ప విషయమన్నారు. ఈ కార్యక్రమంలో జిల్లా మత్స్యకార సంఘం నాయకులు బర్రి చిన్నప్పన్న, జిల్లా మత్స్యశాఖ డిప్యూటీ డైరెక్టర్‌ నిర్మల, వైసిపి మండల అధ్యక్షులు ఉప్పాడ సూర్యనారాయణ రెడ్డి, మత్స్యశాఖ అభివృద్ది అధికారి చాందిని, డైరెక్టర్‌ మైలపల్లి నర్సింహులు, నాయకులు పడాల శ్రీనివాసరావు, కొమ్మూరి సుభోషణరావు, సుందర హరీష్‌, పడాల భాను, పాలెపు కనకరాజు, చిన్నారావు తదితరులు పాల్గొన్నారు.
