మనసున్న అద్భుతం మనిషి

మనిషంటే వస్తువు కాదు
ప్రాణమున్న బొమ్మ కాదు
తెంచుకునే దారం కాదు
తప్పుకు తిరిగే దారి కాదు

ముచ్చటపడి మెరుగుపట్టుకునేది కాదు
ముచ్చటతీరి మరుగున పడేసేది కాదు
అందంకొద్దీ దాచుకునే మురిపెం కాదు
హీనమంటూ చులకన చేసే చీదర కాదు

వాడుకొని పారేసే విలువ కాదు
ఆడుకొని వదిలేసే అలివి కాదు
మిగిలిపోయే శేషం కాదు
పూర్తయ్యే శూన్యం కాదు
ప్రేమించడమన్నది లాభం కాదు

నష్టమొచ్చిందని వదిలేది కాదు
బరువు అనుకునే మోత కాదు
బరువు దించుకునే అల్పం కాదు

అనుకున్న క్షణంలో వచ్చేది కాదు
అనుకోలేదని పోయేది కాదు
అరువు తెచ్చుకునే అందం కాదు
అప్పు తీర్చుకునే రుణం కాదు

రాసి ఇచ్చే ఆస్తి కాదు
పంచి ఇచ్చే సొమ్ము కాదు
ఖర్చు పెట్టే డబ్బు కాదు
బాకీ పడే రుణం కాదు

మనిషంటే మనసున్న అద్భుతం
నిజానికి ప్రతిరూపం
వాస్తవానికి సంకేతం
జీవితానికి నిర్వచనం

చందలూరి నారాయణరావు
97044 37247