ప్రజాశక్తి-బొండపల్లి : రోడ్డు ప్రమాదంలో తీవ్రంగా గాయపడిన వ్యక్తిని చికిత్స కోసం ఓ ప్రయివేట్‌ ఆస్పత్రిలో చేర్పించడమే కాకుండా ఆర్థిక సాయం చేసి మంచి మనసు చాటుకున్నారు.. టిడిపి రాష్ట్ర కార్యనిర్వాహక కార్యదర్శి కరణం శివరామకృష్ణ. చంద్రబాబు అక్రమ అరెస్టుకు వ్యతిరేకంగా గజపతినగరంలో కరణం శివరామకృష్ణ తమ గ్రూపు నాయకులతో కలిసి దీక్ష చేపట్టారు. ఇటీవల గజపతినగరం మండలం పురిటిపెంట గ్రామానికి చెందిన బంగరాల సన్యాసిరావు ద్విచక్రవాహనంపై వస్తుండగా దీక్షా శిబిరానికి సమీపంలో 26వ నంబర్‌ జాతీయ రహదారిపై ప్రమాదం జరిగింది. ఈ ప్రమాదంలో తీవ్ర గాయాలతో ఉన్న సన్యాసిరావును చూసి దీక్షా శిబిరంలో కూర్చున్న కరణం శివరామకృష్ణ తక్షణమే స్పందించారు. విజయనగరంలోని ఓ ప్రయివేట్‌ ఆస్పత్రిలో స్వయంగా చేర్పించి, మానవత్వం చాటుకున్నారు. చికిత్స అనంతరం ఆస్పత్రి ఖర్చుల కింద గాయపడిన సన్యాసిరావుకు శివరామకృష్ణ రూ.10 వేలు నగదు అందజేసి, ఆపన్న హస్తం అందించారు. దీంతో సన్యాసిరావు కుటుంబసభ్యులు ఆయనకు కృతజ్ఞతలు తెలిపారు. ప్రమాదంలో ఉన్న వ్యక్తిని చికిత్స కోసం తానే స్వయంగా ఓ ప్రయివేట్‌ ఆస్పత్రిలో చేర్పించి మానవత్వం చూపడమే కాకుండా, ఆపదలో ఆపన్న హస్తం అందించిన కరణం శివరామకృష్ణను పలువురు అభినందిస్తున్నారు.
