ప్రజాశక్తి-విజయనగరం టౌన్‌ : రైతులు నిర్మించుకున్న మినీ గోకులాలకు నాలుగేళ్లు పూర్తి కావస్తున్న బిల్లులు చెల్లించకపోవడం అన్యాయమని, వెంటనే బిల్లులు చెల్లించాలని కోరుతూ ఎపి రైతు సంఘం ఆధ్వర్యాన సోమవారం కలెక్టరేట్‌ వద్ద రైతులు ధర్నా చేశారు. ఈ సందర్భంగా రైతు సంఘం జిల్లా కార్యదర్శి బి రాంబాబు, ఉపాధ్యక్షులు చల్లా జగన్‌ మాట్లాడుతూ మినీ గోగులాలు నిర్మించండని చెప్పిన అప్పటి ముఖ్యమంత్రి చంద్రబాబునాయుడు గాని, నేటి ముఖ్యమంత్రి జగన్మోహన్‌ రెడ్డి గాని సకాలంలో బిల్లులు చెల్లించకపోవడం రైతులను అన్యాయం చేయడమేనని అన్నారు. అప్పులు చేసి షెడ్‌ లు నిర్మించిన రైతులు గగ్గోలు పెడుతున్నారన్నారు. రైతుల ఆందోళన నేపథ్యంలో గతంలో నిర్మించే గోకులాలకు గత మార్చి 30 లోపు నిర్మించిన షెడ్ల స్థితిని పరిశీలించి పేమెంట్లు ఇవ్వాలని ప్రభుత్వం నుంచి ఆదేశాలు ఉన్నా కింద స్థాయి అధికారులు మాత్రం గోకులాల బిల్లులు పట్టించుకోలేదన్నారు. వెంటనే బిల్లులు చెల్లించాలని కోరారు. కార్యక్రమంలో రైతులు మిడతాన పరదేశి నాయుడు, కొట్టాన అప్పల నాగేశ్వరరావు, ముమ్ములూరి ఈశ్వరరావు, గొల్లు చందర్రావు, కిలపర్తి సత్తిబాబు, రొంగళి జగదీష్‌ తదితరులు పాల్గొన్నారు
