ప్రజాశక్తి-బొబ్బిలి : జగనన్న కాలనీలో మౌలిక సౌకర్యాలు లేకుండా గహ ప్రవేశాలు చేస్తే పేదలు ఎలా నివసిస్తారని ఎంపి బెల్లాన చంద్రశేఖర్‌ను జనసేన రాష్ట్ర ప్రచార కార్యదర్శి బాబు పాలూరి, జిల్లా నాయకులు గురాన అయ్యలు, టిడిపి పట్టణ అధ్యక్షులు రాంబార్కి శరత్‌ ప్రశ్నించారు. జగనన్న ఇళ్ల సామూహిక గృహ ప్రవేశాలకు వచ్చిన ఎంపీని మౌలిక సౌకర్యాలపై ప్రశ్నించారు. ఈసందర్భంగా వారు మాట్లాడుతూ కాలనీలో రోడ్లు, కాలువలు, తాగునీరు లేకుండా జీవించడం సాధ్యమా అని ప్రశ్నించారు. తక్షణమే మౌలిక సౌకర్యాలు కల్పించాలని డిమాండ్‌ చేశారు. పేదల పక్షాన ప్రభుత్వం పని చేస్తుందని, దశలు వారీగా మౌలిక సౌకర్యాలు కల్పిస్తామని ఎంపీ బెల్లాన అన్నారు.
జన కార్యకర్తలను అడ్డుకున్న పోలీసులు
జగనన్న కాలనీలో మౌలిక సౌకర్యాలు కల్పించాలని డిమాండ్‌ చేస్తూ గృహ ప్రవేశాలకు వచ్చిన ఎంపీ బెల్లానను నిలదీసేందుకు వెళ్తున్న జనసైనికులను పోలీసులు అడ్డుకున్నారు. పోలీసులను తప్పించుకుని పరుగులు తీసినప్పటికి పోలీసులు అడ్డుకున్నారు. డిఎస్‌పి పి.శ్రీధర్‌ జోక్యం చేసుకుని ఎంపీ బెల్లానతో మాట్లాడిస్తామని చెప్పడంతో జనసేన కార్యకర్తలు శాంతించారు.
