ప్రజాశక్తి- డెంకాడ : జొన్నాడలోని లెండి ఇంజినీరింగ్‌ కళాశాలలో ఫ్రెషర్స్‌ను ఆహ్వానించే సంప్రదాయంలో భాగంగా శనివారం కళాశాల ఆవరణలో ఫ్రెషర్స్‌డే వేడుకలను ఘనంగా నిర్వహించారు. ఎలక్ట్రికల్‌, మెకానికల్‌, ఎలక్ట్రానిక్స్‌ కంప్యూటర్స్‌, ఇన్ఫర్మేషన్‌ టెక్నాలజీ, కంప్యూటర్‌ సిస్టం ఇంజనీరింగ్‌, ఆర్టిఫిషల్‌ ఇంటలిజెన్స్‌ విభాగాలకు చెందిన సీనియర్‌ విద్యార్థులు విడివిడిగా ఈ కార్యక్రమాన్ని చేపట్టారు. కంప్యూటర్‌ ఇన్ఫర్మేషన్‌ టెక్నాలజీ, ఆర్టిఫిషల్‌ ఇంటలిజెన్స్‌, కంప్యూటర్‌ సిస్టం ఇంజినీరింగ్‌ విభాగపు సభలో హైదరాబాద్‌కు చెందిన ఇన్వెనియో సాఫ్ట్‌వేర్‌ సోల్యుషన్స్‌ సిఇఒ తిరుమల రమేష్‌ నాయుడు మాట్లాడుతూ మంచి అభిరుచితో ఇంజనీరింగ్‌ విద్యాభ్యాసం పూర్తి చేస్తే మంచి అవకాశాలను అందిపుచ్చుకోవచ్చునన్నారు. కంప్యూటర్‌ విభాగపు పూర్వ విద్యార్థులు వసంత్‌, నిఖిల్‌ అతిధులుగా విచ్చేసి వారి అనుభవాలను పంచుకున్నారు. ఎలక్ట్రానిక్స్‌ విభాగంలో గాయత్రీ మెడికల్‌ కళాశాల ప్రొఫెసర్‌ డాక్టర్‌ ఎ.వి.సుభాష్‌ మాట్లాడుతూ విజయానికి నిరంతరం నేర్చుకోవడం అవసరమన్నారు. పూర్వ విద్యార్థి దినేష్‌ క్యాంపస్‌లో విద్యార్థిగా అధ్యాపకుల మద్దతు గురించి చెప్పారు. ఎలక్ట్రికల్‌ విభాగంలో ఎపిఇపిడిసిఎల్‌ సూపరింటెండెంట్‌ ఇంజనీర్‌ ఎం. లక్ష్మణరావు మాట్లాడుతూ విద్యార్థులు నైపుణ్యం కోసం కృషి చేయాలన్నారు. పూర్వ విద్యార్థులు విజయనగరం అసిస్టెంట్‌ రిజిస్ట్రార్‌గా పనిచేస్తున్న రిజ్వాన్‌ షరీఫ్‌, స్టీల్‌ ప్లాంట్‌ ఇంజినీర్‌ సాయిరాం పాల్గొని డిపార్ట్మెంట్‌తో వారివారి అనుభవాలను విద్యార్థులకు వివరించారు. మెకానికల్‌ ఇంజనీరింగ్‌ విభాగ వేడుకలో ఎన్‌ఎస్‌టిఎల్‌ సైంటిస్ట్‌-ఎఫ్‌ డాక్టర్‌ వి. రామకృష్ణ మాట్లాడుతూ సమాజానికి మెకానికల్‌ ఇంజనీర్ల అందిస్తున్న సేవలను వివరించారు. కళాశాల ప్రిన్సిపల్‌ డాక్టర్‌ వి.వి.రామారెడ్డి మాట్లాడుతూ ఇంజినీర్‌ సమస్యల పరిష్కారానికి కృషి చేయాలన్నారు. అనంతరం విద్యార్థులు చేసిన సాంస్కృతిక కార్యక్రమాలు ఆకట్టుకున్నాయి. ఈ కార్యక్రమంలో వైస్‌ ఛైర్మన్‌ పి.శ్రీనివాసరావు, సెక్రటరీ అండ్‌ కరస్పాండెంట్‌ కె.శివరామకృష్ణ, వైస్‌ ప్రిన్సిపాల్స్‌ డాక్టర్‌ హరిబాబు, కె.వి.నరసింహం, ప్లేస్‌ మెంట్‌ డీన్‌ జి.ప్రకాశబాబు, విభాగాధిపతులు డాక్టర్‌ రామారావు, డాక్టర్‌ సుబ్బరామయ్య, డాక్టర్‌ రాజేంద్ర, డాక్టర్‌ ఎం.రాజంబాబు, డాక్టర్‌ వి. ప్రసాద్‌, జి.సతీష్‌, డాక్టర్‌ సతీష్‌పూజారి, డాక్టర్‌ పీడీ శైలజ తదితరులు పాల్గొన్నారు.
