కవాతు కవాతు కవాతు

కవాతు కవాతు కవాతు
దేశభవితకు
భూమిహక్కుకు
చెమటసాగు పంటకు
చేజారే ఫలసాయానికి
రాజధాని వీధుల్లో
రైతు జవాన్ల
కవాతు కవాతు కవాతు

అటు ఎర్రకోట వీధుల్లో
మాతృదేశ భద్రతకు
తెగించి దూకే
వీరజవాన్ల
గణతంత్ర దినోత్సవ
కవాతు కవాతు కవాతు

ఇటు జాతి భవితకు
రాజధాని పొలిమేరల్లో
రైతు జవాన్ల మహోద్యమ
కవాతు కవాతు కవాతు

హింస ప్రతిహింసల
రక్తం మరిగిన
ఆధునిక ప్రపంచానికి
అహింసా మార్గం బోధించి
స్వాతంత్య్రం సాధించిన
జాతిపిత వారసులు
72వ రాజ్యాంగ దినోత్సవం సాక్షిగా
భూమి పుత్రుల
సహన మూర్తుల
కవాతు కవాతు కవాతు

ఐతిహాసిక ఇంద్రప్రస్థమా
చారిత్రాత్మక హస్తినాపురమా
నవఢిల్లీ మహా నగరమా
స్వీయ సుశిక్షితులు
శాంతి సైనికులు
లక్షలాది రైతు ధీరులు
భరతమాత కర్మవీరులు
నీ మునివాకిట
కవాతు కవాతు కవాతు

పాలకులారా!
కళ్ళు తెరవండి
ప్రజల కొరకు ప్రజల చేత ప్రజల వలన
ఏర్పడ్డ చట్టసభలు
అవి చేసే చట్టాలు
ప్రజల కోసం ప్రజల కోసం ప్రజల కోసం
వారి పీకకోసే చట్టాలు చేస్తారా!?
తిరస్కరిస్తే
గుడ్లూరుముతున్నారు,
పళ్ళనూరుతున్నారు
మీ బతుకుల్ని తిరగరాసే
ప్రజాస్వామిక దేవుళ్ళు
కోట్లాది రూపాల్లో
మీ ముందే
కవాతు కవాతు కవాతు

ఇక మీ పెట్టుబడుల
కట్టుకథలకు కాలం చెల్లు
కల్లబొల్లి కబుర్లకు
నటనా చాతుర్యానికి
చెల్లు చెల్లు చెల్లు!
మట్టిబొమ్మలు
మరబొమ్మలు
కాదు కాదు కాదు
ఎర్రకోటలో జై జవాన్లు
ఎర్రబాటలో జై కిసాన్లు
ఈ రిపబ్లిక్‌ డే కవాతు
పబ్లిక్‌ రివల్యూషన్‌ డే
కవాతు కవాతు కవాతు

- కె.శరశ్చంద్ర జ్యోతిశ్రీ