ప్రజాశక్తి - విజయనగరం ప్రతినిధి : విద్యుత్‌ఛార్జీల భారంతో విజయనగరం జిల్లాలోనూ, రాష్ట్ర వ్యాప్తంగా ఫెర్రో పరిశ్రమలు కుదేలయ్యాయి. ఆర్థిక ఇబ్బందులతో కొన్ని ఇప్పటికే మూతపడగా, మరికొన్ని ఒడిదుడుకుల మధ్య నడుస్తున్నాయి. ఒక్క విజయనగరం జిల్లాలో మూతపడ్డ పరిశ్రమల వల్ల ప్రత్యక్షంగా, పరోక్షంగా సుమారు 2వేల కుటుంబాలు జీవనోపాధి కోల్పోయాయి. మిగిలినవి మూతపడితే ఇబ్బందులు పడే కార్మిక కుటుంబాల సంఖ్య మరింతగా పెరుగుతుంది. ఈనేపథ్యంలో ఇటు కార్మికులు, అటు యాజమాన్యాలు ఆందోళన చెందుతున్నా ప్రభుత్వం నుంచి ఎలాంటి చలనం లేకపోవడం గమనార్హం. విద్యుత్‌ ఛార్జీల పెంపునకు నిరసనగా ఈనెల 19న సిపిఎం ఆధ్వర్యాన విజయనగరంలో రాష్ట్ర స్థాయి సదస్సు నిర్వహించనున్నారు.
జిల్లాలో గరివిడి, గుర్ల, మెరకముడిదాం, బొబ్బిలి, కొత్తవలస ప్రాంతాల్లో 21 వరకు ఫెర్రో ఎల్లాయీస్‌ పరిశ్రమలు ఉండేవి. వీటిలో చాలా కాలం క్రితమే మూడు మూతపడ్డాయి. ఈ ఏడాది ఏప్రిల్‌ నుంచి విద్యుత్‌ ఛార్జీలు పెంచడంతో భారాన్ని తట్టుకోలేక బొబ్బిలిలో ఉన్న సిరి ఫెర్రో, యోన, ఇంపెక్స్‌, గరివిడిలో ఉన్న ఆంధ్రా ఫెర్రో సహా మొత్తం 10 పరిశ్రమలు మూతపడ్డాయి. గరివిడి ఫేకర్‌లో ఉత్పత్తి తగ్గించడం వల్ల ఒకే ఒక్క ఫర్నేచర్‌ నడుస్తోంది. రాష్ట్ర వ్యాప్తంగా ఇదే పరిస్థితి. ప్రభుత్వ విధానాలే ఇందుకు కారణం. ఫెర్రో క్రోమ్‌ ఉత్పత్తిలో విద్యుత్తు వినియోగం ఎక్కువగా ఉంటుంది. ఛార్జీలు పెంచితే అనివార్యంగా వాటి మనుగడ భారమౌతుంది. వైసిపి అధికారంలోకి రాకముందు యూనిట్‌ విద్యుత్తు రూ.4.95కు, ఎలక్ట్రిసిటీ డ్యూటీ కింద మరో 5పైసలు కలిపి.. యూనిట్‌ రూ.5కే ఇచ్చేవారు. ఛార్జీలు భారంగా మారడంతో విద్యుత్తు రాయితీల కోసం యాజమాన్యాలు చాలా ఏళ్లుగా ప్రభుత్వానికి విజ్ఞాపనలు చేస్తూనే ఉన్నాయి. ఇటువంటి పరిస్థితుల్లో విద్యుత్‌ రాయితీలు ఇవ్వాల్సిన ప్రభుత్వం ఛార్జీలు మరింతగా పెంచింది. పరిశ్రమలకు ప్రస్తుతం సరఫరా చేస్తున్న ధరపై అదనంగా యూనిట్‌కి రూ.3 చొప్పున పెంచారని యాజమాన్యాలు ఆవేదన వ్యక్తం చేస్తున్నాయి. టన్ను ఉత్పత్తిపై అదనంగా రూ.10 వేల వరకు భారం పడుతుందని చెబుతున్నాయి. నెలకు రూ.2కోట్ల వరకు అదనపు బిల్లు వస్తోందని బొబ్బిలి గ్రోత్‌ సెంటర్‌లోని ఒక ఫెర్రో పెద్ద పరిశ్రమ యజమాని ఆవేదన వ్యక్తం చేశాడు. తమకు రూ.30లక్షల నుంచి రూ.50లక్షల వరకు అదనపు ఛార్జీలు వస్తున్నాయని చిన్న పరిశ్రమల యజమానులు చెబుతున్నారు. మిగిలిన యాజమాన్యాలు కూడా అత్యంత క్లిష్టమైన పరిస్థితుల నడుమ నడుపుతున్నామని, ఇదే పరిస్థితి కొనసాగితే ఎన్నాళ్లో నడపలేమని చెబుతున్నాయి. దీనికితోడు అంతర్జాతీయంగా నెలకున్న పోటీవల్ల స్టీల్‌ తయారీకి అవసరమయ్యే ఫెర్రో సిలికాన్‌, మాంగనీస్‌ వంటి ఉత్పత్తులకు తగిన ధర పలకడం లేదు. ఈ నేపథ్యంలో రాష్ట్ర వ్యాప్తంగా ఫెర్రో పరిశ్రమలను మూసివేసేందుకు ఫెర్రో ఎల్లాయీస్‌ పరిశ్రమల అసోసియేషన్‌ కూడా ప్రభుత్వానికి అనేక సార్లు సమస్యను విన్నవించింది. మరోవైపు కార్మికులు సిఐటియు ఆధ్వర్యాన ఆగస్టు 1న విజయనగరం కేంద్రంగా ఫెర్రో ఎల్లాయీస్‌ కార్మికుల సదస్సు చేపట్టిన సంగతి తెలిసిందే. తాజాగా విద్యుత్‌ భారాలకు వ్యతిరేకంగా సిపిఎం ఆధ్వర్యాన విజయనగరంలో గురువారం సదస్సు నిర్వహిస్తున్నారు.
