ప్రజాశక్తి-విజయనగరం కోట : కథకు ఉత్తరాంధ్ర పుట్టినిల్లు అని ప్రముఖ కవి, రచయిత గంటేడ గౌరునాయుడు అన్నారు. ప్రముఖ రచయిత్రి ఇనుగంటి జానకి రచించిన 'వెలుగు వైపు' కథా సంపుటిని ఆదివారం సాహితీ స్రవంతి ఆధ్వర్యంలో స్థానిక గురజాడ స్మారక జిల్లా కేంద్ర గ్రంధాలయంలో గౌరునాయుడు తదితరులు ఆవిష్కరించారు. మళ్లీ పురం జగదీష్‌ పుస్తక సమీక్ష చేశారు. అదేవిధంగా బాలల నాటికలు పుస్తకాన్ని కెవి శేషారావు ఆవిష్కరించగా, వీపు విజరు కుమార్‌ సమీక్షించారు. అనంతరం గంటేడ గౌరునాయుడు మాట్లాడుతూ కథకు తూర్పు దిక్కు ఉత్తరాంధ్ర అని అన్నారు. మిగతా ప్రాంతాలతో పోటీపడి మంచి కథలు రావాలని, నడుస్తున్న జీవితం కథలు వస్తే ఇంకా బాగుంటుందని అన్నారు. నేటి ప్రభుత్వాలు ఇస్తున్న సంక్షేమ పథకాలు రైతన్న గాథలుపై కథలు రావాలని ఆశించారు. కవి పాయల మురళీ కృష్ణ అధ్యక్షతన జరిగిన ఈ కార్యక్రమంలో రచయిత్రి ఇనుగంటి జానకిని ఘనంగా సత్కరించారు. కార్యక్రమంలోసాహితీ స్రవంతి రాష్ట్ర కార్యదర్శి చీకటి దివాకర్‌, రచయితలు పిఎస్‌ శ్రీనివాస్‌, చీకటి చంద్రిక రాణి, రెడ్డి శంకర్రావు, బాలకృష్ణ, చలం, రామకృష్ణ తదితరులు పాల్గొన్నారు.
