ప్రజాశక్తి-విజయనగరం : బొబ్బిలి వీణ స్థానిక సంప్రదాయ కళ గా మిగిలిపోకుండా జాతీయ, అంతర్జాతీయ స్థాయిలో మార్కెటింగ్‌ జరిగేలా చూస్తామని జిల్లా కలెక్టర్‌ నాగలక్ష్మి తెలిపారు. అందుకోసం హస్త కళాకారులకు అవసరమగు సాంకేతిక నైపుణ్య శిక్షణ ఇచ్చి ప్రోత్సహిస్తామని పేర్కొన్నారు. బొబ్బిలి వీణ వన్‌ డిస్ట్రిక్ట్‌ వన్‌ ప్రొడక్ట్‌ క్రింద అవార్డుకు నామినేట్‌ అయిన సందర్భంగా కళాకారులను కలిసిన అనంతరం శుక్రవారం కేంద్ర బృందం జిల్లా కలెక్టర్‌ ను తన ఛాంబర్‌లో కలిసింది. ఈ సందర్భంగా కలెక్టర్‌ మాట్లాడుతూ వీణలు తయారు చేసే కళాకారులకు కావలసిన మౌలిక వసతుల కల్పనకు చర్యలు తీసుకుంటా మన్నారు. జాతీయ స్థాయిలో జియోగ్రాఫికల్‌ ఇండెక్స్‌ తో అనుసంధానం చేస్తామని తెలిపారు. కార్యక్రమంలో కేంద్ర బృందం సభ్యులు రాబిన్‌ చరియన్‌, నమీరా, జిల్లా చేనేత అధికారి మురళి కృష్ణ, అభివృద్ధి అధికారి వసంత, జిల్లా పర్యాటక అధికారి లక్ష్మీనారాయణ తదితరులు పాల్గొన్నారు.
