ప్రజాశక్తి - భోగాపురం : కాలువ నిర్మిస్తే సహించేది లేదని సిద్ధార్థ కాలనీ వాసులు మరోసారి అధికారులకు తేల్చి చెప్పారు. మండలంలోని ముంజేరు గ్రామంలో సిద్ధార్థ కాలనీలో కాలువ నిర్మాణంపై గ్రామస్తులకు కాలనీవాసులకు మధ్యగత కొన్ని రోజుల నుంచి వివాదం జరుగుతున్న విషయం తెలిసిందే. దీనిలో భాగంగా పోలీస్‌, రెవెన్యూ, మండల పరిషత్‌ అధికారులు బుధవారం సాయంత్రం కాలనీ వాసులతో సమావేశం ఏర్పాటు చేశారు. ఈ సందర్భంగా తహశీల్దార్‌ బంగార్రాజు మాట్లాడుతూ అభివృద్ధి జరగాలంటే కాలువలు, రోడ్లు నిర్మించాల్సి ఉంటుందని వాటిని అడ్డుకోవద్దని అన్నారు. కానీ కాలనీవాసులు తమ వైపు కాకుండా వేరే వైపు నిర్మించాలని తెలిపారు. మీరు అనుకున్న ప్రకారం నిర్మించాలంటే అక్కడ జిరాయతీ భూమి ఉన్నందున సాధ్యం కాదని ఆయన అన్నారు. ఇరుపక్షాల నుంచి చెరో ఐదుగురితోపాటు సర్పంచ్‌, ఎంపిటిసిలతో కలిసి కమిటీ వేద్దామని, ఆ కమిటీ నిర్ణయం తీసుకుంటే దాని కట్టుబడి ఉండాలని ఆయన సూచించారు. దానికి కూడా కాలనీవాసులు ఒప్పుకోలేదు. దీనితో అధికారులు వెనుదిరిగారు. సిఐ బి.వి వెంకటేశ్వరరావు, ఎంపిడిఒ అప్పలనాయుడు, ఎస్‌ఐ కృష్ణమూర్తి, ఇఒపిఆర్‌డి సురేష్‌, జెఇ చంద్రు నాయుడు తదితరులు పాల్గొన్నారు.
