ప్రజాశక్తి-వంగర : ఎన్నో ఆర్థిక ఇబ్బందులు పడి.. ఎంతో ఆశతో మొక్కజొన్న పంటపై మదుపులు పెట్టి, రాత్రనకా పగలనకా కష్టపడి పండించిన రైతులకు కన్నీరే మిగిలింది.ఈ ఏడాది ఖరీఫ్‌ లో వేసిన మొక్కజొన్న ఓవైపు వర్షాభావం, మరోవైపు కత్తెరపురుగుతో పంట దిగుబడి పూర్తిగా తగ్గిపోయింది. పండిన కొద్దిపాటి పంటకు కూడా దళారులు దందాతో గిట్టుబాటు లేకపోవడంతో రైతులు తీవ్రంగా నష్టపోతున్నారు. అప్పులు చేసి పంటపై పెట్టిన మదుపులు అయినా రావని తెలుసుకున్న రైతులు దిక్కుతోచని స్థితిలో కన్నీరు పెడుతున్నారు. ప్రభుత్వం ఆదుకోవాలని కోరుతున్నారు.
మండలంలో అధికారిక లెక్కల ప్రకారంగా 548 ఎకరాలలో ఈ ఏడాది ఖరీఫ్‌లో మొక్కజొన్న పంటను రైతులు వేశారు. గత ఏడాదితో పోలిస్తే ఈ ఏడాది మొక్కజొన్న పంట భారీగా దిగుబడి తగ్గింది. గత ఏడాది ఎకరాకు 25 క్వింటాల నుంచి 30 క్వింటాలు వరకు దిగుబడి వస్తే ఈ ఏడాది మాత్రం ఎకరాకు రెండు క్వింటాలు నుండి ఐదు క్వింటాలు రావడం కష్టంగా ఉందని రైతులు వాపోతున్నారు. ప్రస్తుతం మొక్కజొన్న కోత దశకు చేరడంతో రైతులంతా పనులు ముమ్మరంగా చేస్తున్నారు. దిగుబడి పూర్తిగా లేకపోవడంతో రైతులు ఆవేదన చెందుతున్నారు. అప్పులు చేసి ఎన్నో మదుపులు పెట్టినప్పటికీ కనీసధర కూడా లేదని రైతులు వాపోతున్నారు.
వర్షాభావం..ఆపై కత్తెర పురుగు
ఖరీఫ్‌ సీజన్లో వరికి బదులుగా ప్రత్యామ్నాయ పంటలు వేసుకోవాలని అధికారులు సూచించడంతో ఎక్కువ మంది రైతులు ఈ ఏడాది ఖరీఫ్‌ లో మొక్కజొన్న పంటను వేశారు. అయితే సక్రమంగా వర్షాలు కురవకపోవడం, చివరి దశలో కత్తెర పురుగు ప్రభావం అధికమవడం దిగుబడి తగ్గిపోయిందని పలువురు రైతులు తెలిపారు.
కొనసాగుతున్న దళారుల హవా
గ్రామాల్లో మొక్కజొన్న పంట పాత కోసి నూర్పు చేసి ఆరబెట్టి అమ్మకానికి రైతులు సిద్ధం చేస్తున్నారు. అయితే ఈ కొద్దిపాటి పంటను కూడా ప్రభుత్వం కొనుగోలు చేయకపోవడంతో ఇదే ఆదునుగా దళారులు తమకు నచ్చినంతకు కొనుగోలు చేసి దోచుకుంటున్నారు.
మదుపులు రావడం లేదు
నేను ఒక ఎకరం పొలంలో మొక్కజొన్న వేసి రూ.15వేలు ఖర్చు చేశాను. ఐదు క్వింటాలు దిగుబడి వచ్చింది. దానిని అమ్మితే పదివేల రూపాయలకు వస్తుంది. పంటపై పెట్టిన పెట్టుబడి కూడా రాకపోవడంతో చాలా బాధగా ఉంది.
నివర్తి మోహనరావు, రైతు, చిన రాజులగుమ్మడ.
వ్యవసాయం చేయడం కష్టంగా ఉంది.
ఏడాది ఖరీఫ్‌ లో వేసిన మొక్కజొన్న పంట దిగుబడి లేకపోవడంతో తీవ్ర నష్టం జరిగింది. పంట సాగుకు చేసిన అప్పులు కూడా తీరేలా లేవు. రైతులను ప్రభుత్వం ఆదుకోవాలి.
మాచర్ల రాంబాబు, రైతు, శివ్వాం
దిగుబడి తగ్గడం వాస్తవమే
రైతులు ఈ ఏడాది ఖరీఫ్‌ లో వేసిన మొక్కజొన్న దిగుబడి తగ్గడం వాస్తవమే. ప్రభుత్వం తరఫున కొనుగోలు చేసేందుకు మాకు ఎటువంటి అనుమతులు ఇంతవరకు లేవు. నష్టపరిహారం చెల్లించేందుకు కూడా మాకు ఎటువంటి ఆదేశాలు లేవు.
టి. కన్నబాబు, వ్యసాయ అధికారి, వంగర.
