ప్రజాశక్తి-విజయనగరం కోట : వినతులను నిర్ణీత కాల వ్యవధిలో పరిష్కరించని అధికారులపై చర్యలు తీసుకుంటామని కలెక్టర్‌ ఎస్‌.నాగలక్ష్మి చెప్పారు. కలెక్టరేట్‌ ఆడిటోరియంలో సోమవారం ప్రజల నుంచి కలెక్టర్‌తో పాటు జెసి మయూర్‌ అశోక్‌, డిఆర్‌ఒ ఎస్‌.డి.అనిత, ఇతర జిల్లా అధికారులు వినతులు స్వీకరించారు. మొత్తంగా 182 మంది తమ సమస్యలపై వినతులు ఇచ్చారు.
- నిషేధిత జాబితా నుంచి తమ భూములను తొలగించాలని విజయనగరం మండలం కొండ కారకం గ్రామానికి చెందిన కిలారి వెంకటరమణ, గ్రామ రైతులు కలిసి కలెక్టర్‌కు వినతినిచ్చారు.
- విజయనగరం నియోజక వర్గంలో బెల్టుషాపులను అరికట్టాలని టిడిపి నాయకులు వినతినిచ్చారు. నియోజకవర్గ పరిధిలోగల 3500 బెల్ట్‌ షాపులను వెంటనే తొలంగించాలని కోరారు.కార్యక్రమంలో జిల్లా ప్రధాన కార్యదర్శి ఐవిపి రాజు, పట్టణ అధ్యక్షులు ప్రసాదుల లక్ష్మీ వరప్రసాద్‌, మండల పార్టీ అధ్యక్షులు బొద్దల నర్సింగరావు, కార్యదర్శి , కనకల మురళీమోహన్‌ పాల్గొన్నారు.
- వ్యవసాయం చేసుకోవడానికి తీగబంద నుంచి వ్యవసాయ భూములకు కాలువ నిర్మించాలని గజపతినగరం మండలం పాతబగ్గాం గ్రామానికి చెందిన రైతులు కలెక్టర్‌ను కోరారు.
- గతంలో నిర్మించుకున్న గోకులాలకు బిల్లులు చెల్లించాలని వేపాడ మండలం ఎస్‌ కోట సీతారాంపురం గ్రామానికి చెందిన రైతు గొల్లు ఎర్రన్న కోరారు.
- కొప్పెర్ల గురుకుల పాఠశాలలో వంట మనిషిగా పనిచేసిన తనను తొలగించారని, కుటుంబ ఆర్థిక ఇబ్బందుల దృష్ట్యా తనకు తిరిగి పని ఇవ్వాలని పూసపాటిరాగ మండలం వెంపడం గ్రామానికి చెందిన డొక్కా రాంబాబు కోరాడు.
అనంతరం ప్రజా వినతుల పరిష్కారంపై కలెక్టర్‌ అధికారులతో సమీక్షించారు. వినతుల పరిష్కారంలో జాప్యం వద్దని పలు మార్లు స్పష్టంచేసినప్పటికీ పలు శాఖల వినతులు పెండింగ్‌లో వుండటంపై అసంతప్తి వ్యక్తంచేశారు. అర్జీదారుల సంతృప్తి మేరకు పరిష్కరించిన వినతులపై ఆయా శాఖాధిపతులు, మండల ప్రత్యేక అధికారులు నివేదికలు అందించాల్సి వుందన్నారు. భూసేకరణ అధికారులు వెంకటేశ్వరరావు, పద్మలత, సుదర్శన దొర తదితరులు వినతుల స్వీకరణలో పాల్గొన్నారు.
మధ్యాహ్న భోజన కార్మికులు జీతాలు పెంచాలి
మధ్యాహ్న భోజన కార్మికులకు వేతనాలు పెంచి, వారి సమస్యలు పరిష్కరించాలని కోరుతూ ఎఐటియుసి ఆధ్వర్యాన కలెక్టరేట్‌ వద్ద ధర్నా చేశారు. కార్యక్రమంలో ఎఐటియుసి జిల్లా అధ్యక్ష, ప్రధాన కార్యదర్శి ఎస్‌.రంగరాజు, బుగత అశోక్‌, కార్యదర్శి అప్పలరాజు పాల్గొన్నారు.
భవన నిర్మాణ కార్మిక సంక్షేమ బోర్డు పునరుద్ధరించాలి
రాష్ట్రంలో భవన నిర్మాణరంగ కార్మికుల సంక్షేమ బోర్డును పునరుద్దరించాలని డిమాండ్‌ చేస్తూ ఎపి బిల్డింగ్‌ అండ్‌ కన్స్ట్రక్షన్‌ వర్కర్స్‌ యూనియన్‌ రాష్ట్ర ప్రధాన కార్యదర్శి పడాల రమణ డిమాండ్‌ చేశారు. ఈమేరకు కలెక్టరేట్‌ వద్ద ధర్నా నిర్వహించారు. రాష్ట్ర ప్రభుత్వం దారి మళ్లించిన 1200 కోట్లు సంక్షేమ బోర్డు నిధులను వెంటనే బోర్డుకు జమ చేయాలని డిమాండ్‌ చేశారు. కార్యక్రమంలో ఎఐటియుసి జిల్లా ప్రధాన కార్యదర్శి బుగత అశోక్‌, యూనియన్‌ జిల్లా అధ్యక్షుడు మాజీ ఆదిబాబు, జిల్లా ఉపాధ్యక్షుడు జి. శంకర్రావు తదితరులు మాట్లాడారు.
