ప్రజాశక్తి - విజయనగరం ప్రతినిధి : రైతుల ఇకెవైసి నమోదు ప్రక్రియ 93శాతానికి చేరింది. ఈనెల 13వ తేదీ లోపు ఈ ప్రక్రియ పూర్తిచేయాలని వ్యవసాయ శాఖ అధికారులకు ప్రభుత్వం నిర్థేశించింది. 15వ తేదీ నుంచి 19వ తేదీ వరకు గ్రామ సభల ద్వారా సామాజిక తనిఖీలు నిర్వహించనున్నారు. అనంతరం 23వరకు అభ్యంతరాలను స్వీకరిస్తారు. 25న తుదిజాబితా వెలవడనుంది. వీలైనంత వరకు రేపటి (13వ తేదీ)లోపు ఇకెవైసి నమోదు పూర్తిచేసేందుకు, అప్పటికీ మిగిలిపోయినవి సాంఘిక తనిఖీల గడువులోపు పూర్తి చేసేందుకు వ్యవసాయ శాఖ అధికారులు కసరత్తు చేస్తున్నారు. రైతులు వ్యవసాయ పథకాలు పొందాలంటే ఇకెవైసి తప్పనిసరి. ఇకెవైసి చేసుకున్న రైతులకు మాత్రమే ప్రభుత్వ పథకాలకు సంబంధించి పంటల బీమా, పంటలు కొనుగోలుకు, సున్నావడ్డీ పంట రుణాలకు, కౌలు రుణాలకు, ప్రకతి వైపరీత్యాలు వల్ల సంభవించిన పంట నష్టం గణనకు ఇకెవైసి అత్యంత కీలకంగా పరిగణిస్తారు. ఇకెవైసి ఉంటే తప్ప రైతులు పథకాలేవీ వర్తించే పరిస్థితి లేదు. జిల్లాలో వరి, మొక్కజొన్న, పత్తి, నువ్వులు, జీడిమామిడి తదితర అన్ని పంటలూ కలుపుకుని 2,11,664 మంది రైతులు 3,56,832 ఎకరాల్లో సాగు చేశారు. వీరిలో 1,90,621 మంది (93శాతం) ఇప్పటి వరకు ఇకెవైసి నమోదు చేసుకున్నట్టు అధికారులు చెబుతున్నారు. వారి పరిధిలో 3,30,060 ఎకరాల సాగు విస్తీర్ణం ఉన్నట్టుగా అధికారులు గుర్తించారు. మిగిలిన 26,772 ఎకరాల పరిధిలోని 21,043 మంది (7శాతం) రైతులు సమీపంలోని ఆర్‌బికెల్లో ఇకెవైసి నమోదు చేసుకోవాలని వ్యవసాయ శాఖ అధికారులు కోరుతున్నారు. స్థానికంగా అందుబాటులో లేని రైతులు కూడా తమ సెల్‌ఫోన్లు ద్వారా నమోదు చేసుకోవచ్చని, ఆ వివరాలను ఆర్‌బికె సిబ్బంది ద్వారా తెలుసుకోవాలని చెబుతున్నారు. 25న తుదిజాబితా విడుదలైన తరువాత ఇకెవైసి చేయించుకోవడం బహుశా సాధ్యం కాకపోవచ్చు. ఈ నేపథ్యంలో రైతులు మేల్కోవాల్సివుంది.
