ప్రజాశక్తి-నెల్లిమర్ల : ఇ-పంట నమోదు త్వరితగతిన పూర్తి చేయాలని జాయింట్‌ కలెక్టర్‌ మయూర్‌ అశోక్‌ వ్యవసాయ శాఖ సిబ్బందిని ఆదేశించారు. మంగళవారం మండలంలోని సీతారామునిపేట, రామతీర్థం, ఆత్మరాముని అగ్రహారంలో వరి పంట పొలాలను ఆయన పరిశీలించారు. ఈ సందర్భంగా జెసి మాట్లాడుతూ బయోమెట్రిక్‌ నమోదు శతశాతం పూర్తి చేయాలని సూచించారు. జిల్లా వ్యవసాయ అధికారి విటి రామారావు మాట్లాడుతూ మండలంలో మొత్తం 8250 ఎకరాల్లో పంటలను ఇ-క్రాప్‌లో నమోదు చేసినట్లు తెలిపారు. విఎఎ, విఆర్‌ఒ బయోమెట్రిక్‌ 100 శాతం, రైతులు బయోమెట్రిక్‌ 90 శాతం అయిందని జెసికి వివరించారు. ఇ-పంటలో నమోదు చేసుకున్న ప్రతి రైతూ బయోమెట్రిక్‌ వేసుకోవాలని చెప్పారు. వారికే ధాన్యం కొనుగోలు, పంటలు బీమా, సున్నావడ్డీ పంట రుణాలు, పంట నష్టపరిహారం, వ్యవసాయ సబ్సిడీలు వర్తిస్తాయని తెలిపారు. కార్యక్రమంలో ఎడి ఎన్‌ కోటేశ్వరరావు, తహశీల్దార్‌ డి.ధర్మరాజు, ఎఒ ఎం.పూర్ణిమ, ఎఇఒ కూర్మారావు, నాగరాజు, విఆర్‌ఒ టి.శివప్రసాద్‌, విఎఎ శ్యామ్‌కుమార్‌, చంద్రరావు, శివకుమార్‌, సర్పంచ్‌ రామారావు, రైతులు పాల్గొన్నారు.
