గూగుల్‌ ఫోటోస్‌ నుంచి అపరిమిత డేటా స్టోరేజ్‌ సౌకర్యాన్ని ఈ ఏడాది మొదట్లో గూగుల్‌ తొలగించిన విషయం తెలిసిందే. ఈ నేపథ్యంలో.... చాలామంది యూజర్లు డేటా భద్రత విషయంలో ఇబ్బందులు ఎదుర్కొంటున్నారు. ఒకవేళ... 15 జిబి స్టోరేజ్‌ దాటితే ఆటోమేటిక్‌గా ఆల్రెడీ స్టోర్‌ అయ్యి ఉన్న డేటా డిలీట్‌ అయిపోతుంది. దీంతో ముఖ్యంగా వర్క్‌ఫ్రం హోం యూజర్లు తీవ్రంగా ఇబ్బందిపడుతున్నారు. ఈ సమస్యకు పరిష్కారంగా... జిమెయిల్‌, గూగుల్‌ డ్రైవ్‌, ఫొటోస్‌ డేటాను దాచుకునేందుకు గూగుల్‌ తక్కువలో కొత్తప్యాకేజీని ప్రవేశపెట్టింది.
కొత్తగా క్లౌడ్‌ స్టోరేజ్‌ ప్లాన్‌లు..
వర్క్‌ఫ్రమ్‌ హోం వంటి తదితర కారణాలతో డేటా స్టోరేజ్‌ ఇబ్బందులు ఎదుర్కొంటున్న యూజర్లకు గూగుల్‌ గుడ్‌ న్యూస్‌ చెప్పింది. కొత్తగా క్లౌడ్‌ స్టోరేజ్‌ ప్లాన్‌లను ప్రకటించింది. అందులో 5 టిబి స్టోరేజ్‌ ప్లాన్‌ను మంత్లీ, ఇయర్లీ ప్యాకేజీవారీగా తక్కువ ధరకే అందిస్తుంది. 15 జిబి డేటా స్టోరేజ్‌ దాటితే.. కచ్చితంగా స్టోరేజ్‌ ను కొనుగోలు చేయాలని, లేకపోతే కొత్తగా డేటా స్టోర్‌కాదని, పైగా ఆల్రెడీ స్టోరేజ్‌పై ప్రభావం పడి డిలీట్‌ అయ్యే ఛాన్స్‌ ఉందని గూగుల్‌ స్పష్టం చేసింది.
పరిధి దాటి వాడితే స్టోరేజ్‌ను కొనాలి..
గూగుల్‌ సర్వీస్‌లోని జీమెయిల్‌, గూగుల్‌ ఫొటోస్‌లోని ఇమేజెస్‌, వీడియోస్‌, గూగుల్‌ డ్రైవ్‌లో ఏదైనా డేటాను స్టోర్‌ చేసుకోవడానికి ఒక లిమిట్‌ (15 జిబి) అంటూ ఉంది కదా.. ఒకవేళ ఆ పరిధి దాటి ఉపయోగించుకోవాల్సి వస్తే.. స్టోరేజ్‌ను మంత్లీ, ఇయర్లీ ప్యాకేజీల వారీగా కొనుగోలు చేసుకోవాల్సి ఉంటుంది. తాజాగా గూగుల్‌ వన్‌ యాప్‌ ప్రకటన ప్రకారం.. తక్కువ ధరలో 5 టిబి స్టోరేజ్‌ కోసం నెలకు 1,649 రూ. అందిస్తుండగా, ఏడాది ప్లాన్‌కు 15,900రూ. చెల్లించాల్సి ఉంటుంది.
స్టోరేజ్‌ ప్యాకేజీ రేట్లు...
గత ప్లాన్‌ల ప్రకారంగానే స్టోరేజ్‌ ప్యాకేజీలను గూగుల్‌ యూజర్లకు అందిస్తోంది. 100 జిబి స్టోరేజ్‌ కోసం నెలకు రూ.130 చెల్లిస్తే.. , ఏడాదికి 1,300రూ. చెల్లించాలి. 200 జిబి ప్లాన్‌ కోసం నెలకు 210రూ., ఏడాదికి 2,100రూ. చెల్లించాలి. 2 టిబి స్టోరేజ్‌ కోసం నెలకు 650రూ., ఏడాదికి రూ.6,500 చెల్లించాల్సి ఉంటుంది. ఈ మూడు ప్లాన్స్‌ కూడా గూగుల్‌ వన్‌ వెబ్‌సైట్‌, యాప్‌ ద్వారా సబ్‌స్క్రయిబ్‌ చేసుకోవచ్చు.
2 టిబి స్టోరేజ్‌ దాటితే యాప్‌ ద్వారానే సబ్‌ స్క్రయిబ్‌ చేసుకోవాలి..
2 టిబి స్టోరేజ్‌ కంటే మించిన ప్లాన్స్‌ మాత్రం యాప్‌ ద్వారానే సబ్‌ స్క్రయిబ్‌ చేసుకోవాల్సి ఉంటుంది. యాప్‌లో 10 టిబి ప్లాన్‌ నెలకు రూ.3,249 కాగా, 20 టిబి స్టోరేజ్‌కు నెలకు 6,500రూ. చెల్లించాల్సి ఉంటుంది. ఇక టాప్‌ టైర్‌ ప్లాన్‌గా చెప్పుకునే 30 టిబి స్టోరేజ్‌ కోసం నెలకు 9,700రూ. చెల్లించాల్సి ఉంటుంది. 100 జిబి, 200 జిబి, 2 టిబి ప్లాన్స్‌ గూగుల్‌ వన్‌ వెబ్‌సైట్‌ కంటే యాప్‌లో అత్యధిక రేటుకు అందజేయడం గమనార్హం.
5 టిబి స్టోరేజ్‌ను అందరితోనూ పంచుకోవచ్చు..
5 టిబి స్టోరేజ్‌ను కుటుంబ సభ్యులతో, స్నేహితులతో కలిసి పంచుకునే వీలు కూడా ఉంది. అంతేకాదు భారత్‌లో కొన్ని ప్రాంతాల్లో గూగుల్‌ వీపీఎన్‌ సర్వీస్‌ సైతం ఉపయోగించుకునే వెసులుబాటును కల్పించనుంది గూగుల్‌.
