ప్రజాశక్తి-శృంగవరపుకోట : మండలంలోని తాటిపూడి వద్దనున్న గురుకుల విద్యార్థులకు నాణ్యతలేని భోజనం పెడుతున్నారు. ఇటీవల ఆ గురుకులాన్ని 'ప్రజాశక్తి' సందర్శించగా దిమ్మతిరిగే వాస్తవాలు కనిపించాయి. అల్పాహారంలో మెనూ ప్రకారం పూరి, ఆలు బఠాణి కుర్మా, ఉడకబెట్టిన గుడ్డు విద్యార్థినులకు ఇవ్వాలి. అప్పడాలు లాంటి పూరీలు, కుళ్లిన కోడి గుడ్లు, రసం వల్లే పలచగా ఆలు బఠానీ కుర్మా వంటశాలలో కనిపించాయి. కోడి గుడ్లు సైజులోనూ చేతివాటం చూపిస్తున్నారు. అంతేకాకుండా గోధుమ పిండితో పూరీలు విద్యార్థినులతో తయారు చేయిస్తున్నారు. వసతిగృహ స్టాక్‌ పాయింట్‌ కూడా సరిగా లేదు. వాడిపోయిన కూరగాయలు, ఎండిపోయిన ఆకుకూరలు కనిపించాయి. సుమారు నెలరోజుల కిందట ఈ గురుకులాన్ని సందర్శించిన ఆహార భద్రతా కమిషన్‌ సభ్యులు కాంతారావు విద్యార్థినులకు కల్పిస్తున్న సౌకర్యాలపై అసంతృప్తి వ్యక్తం చేశారు. కొద్ది రోజుల్లో మళ్లీ గురుకుల పరిశీలనకు వస్తానని, సిబ్బంది తీరు మారకుంటే చర్యలు తప్పవని హెచ్చరించారు. అయినా, విద్యార్థినులకు ఆహారం అందించడంలో మార్పు రాలేదు. గురుకులంలోని విద్యార్థులలో రక్తహీనత ఎక్కువగా ఉన్నట్టు కనిపిస్తుంది. ఉదయం 10 గంటల వరకు అల్పాహారం పెట్టలేదు. ఈ సమయంలో గురుకులంలో నర్స్‌ మాత్రమే ఉన్నారు. వార్డెన్‌ గాని, ప్రిన్సిపల్‌ గాని స్థానికంగా లేరు. ప్రిన్సిపల్‌ సంధ్యా భార్గవికి ఫోన్‌ చెయ్యగా 10 గంటల తర్వాత గురుకులానికి వస్తానని చెప్పారు. విద్యార్థినులతో పనులు చేయిస్తున్నారని ప్రశ్నించగా, అటువంటిదేదీ లేదని అంతా నాణ్యంగా చేస్తున్నామని ఆమె బదులీయడంతో గురుకుల విద్యార్థినుల పట్ల సిబ్బంది వైఖరి తేటతెల్లమైంది.
