ప్రజాశక్తి-విజయనగరం : గర్భస్థ లింగ నిర్ధారణ చేసినవారిపై క్రిమినల్‌ కేసులు నమోదు చేస్తామని జిల్లా వైద్యారోగ్య శాఖాధికారి డాక్టర్‌ ఎస్‌.భాస్కరావు హెచ్చరించారు. గర్భధారణ పూర్వ మరియు గర్భస్థ పిండ ప్రక్రియ చట్టం-1994 అమలుపై జిల్లా స్థాయి, ఉప జిల్లా స్థాయి సలహా కమిటీ సమావేశాలు శుక్రవారం డిఎంఅండ్‌హెచ్‌ఒ కార్యాలయంలో జరిగాయి. ఈ సందర్భంగా ఆయన మాట్లాడుతూ, గర్భస్థ పిండ పరిస్థితి, వ్యాధుల గుర్తింపు తదితర పరీక్షలకు ఉపయోగించవలసిన యంత్రాలను, లింగ నిర్ధారణకు ఉపయోగిస్తే క్రిమినల్‌ చర్యలు తీసుకోవాలని ఆదేశించారు. స్కానింగ్‌ సెంటర్లను తరచూ తనిఖీ చేయాలని ప్రోగ్రామ్‌ అధికారులకు సూచించారు. సమావేశంలో వ్యాధినిరోధక టీకా అధికారి, పిసిపి అండ్‌ డిటి నోడల్‌ ఆఫీసర్‌ డాక్టర్‌ అచ్యుతకుమారి, డిప్యూటీ డిఅండ్‌హెచ్‌ఒ డాక్టర్‌ ఎన్‌.సూర్యనారాయణ, స్త్రీవ్యాధి వైద్య నిపుణులు డాక్టర్‌ అరుణ శుభశ్రీ, పిల్లల వైద్య నిపుణులు డాక్టర్‌ ఆర్‌.సుజాతదేవి, పబ్లిక్‌ ప్రాసిక్యూటర్‌ పివిఎస్‌ జయలక్ష్మి, నేచర్‌ ఎన్‌జిఒ ప్రతినిధి జికె దుర్గ, ప్రయివేటు స్కానింగ్‌ సెంటర్ల ప్రతినిధి డాక్టర్‌ జెసి నాయుడు పాల్గొన్నారు.
