ప్రజాశక్తి - విజయనగరం ప్రతినిధి : ఇటు విజయనగరం, అటు పార్వతీపురం మన్యం జిల్లాల్లో వర్షాభావ పరిస్థితులు వెంటాడుతున్నాయి. దీంతో, ఇరు జిల్లాల్లోనూ అత్యంత ప్రధానమైన వరి పంట ఎండిపోతోంది. నీరు లేక పలు గ్రామాల్లో దుర్భిక్ష పరిస్థితులు కనిపిస్తున్నాయి. దీంతో రైతులు ఆందోళనకు గురౌతున్నారు. ఇదే పరిస్థితి కొనసాగితే వరిపై ఆశలు వదులుకోవాల్సిందేనంటూ ఆవేదన చెందుతున్నారు.
విజయనగరం జిల్లాలో ఈ ఖరీఫ్‌లో వరి 2,25,637 ఎకరాల్లో సాగుకావాల్సి వుండగా 2,24,632 ఎకరాల వరకు సాగైంది. మిగిలిన విస్తీర్ణంలో ఇతర పంటలన్నీ ఉన్నాయి. జిల్లాలో పెద్దగా సాగునీటి ప్రాజెక్టులు లేవు. తోటపల్లి కాలువలు ఉన్నప్పటికీ నిర్వహణ సరిగా లేకపోవడం, పిల్లకాలువల పనులు పూర్తిచేయకపోవడం వంటి కారణాల వల్ల అరకొరగానీ నీరు అందుతోంది. ఆండ్ర, తాటిపూడి వంటి జలాశయాల పరిధిలోనూ ఇటువంటి ఆటంకాలే ఉన్నాయి. ఇటువంటి పరిస్థితుల్లో వరుణుడు కూడా ముఖం చాటేయడంతో పంట పొలాలు ఎండిపోతున్నాయి. జూన్‌లో 51.9 మిల్లీమీటర్ల వర్షపాతం లోటు ఉండడంతో నారు వేయడం ఆలస్యమైంది. జులైలో వర్షాలు సహకరించడంతో నారుపోతలు పూర్తయినప్పటికీ ఆగస్టులో తిరిగి లోటు వర్షపాతం నమోదు కావడంతో సెప్టెంబర్‌ నెలాఖరు వరకూ పడిన వర్షపునీటితోనే రైతులు ఉబాలు పట్టారు. ఉబాలు అయ్యాయంటూ ఊపిరి పీల్చుకునే లోపు తిరిగి అక్టోబర్‌ 1వ తేదీ నుంచి పూర్తిగా వర్షాలు కురవలేదు. గడిచిన 13రోజుల వ్యవధిలో 83.5 మి.మీ లోటు వర్షపాతం నమోదైంది. మొత్తం 27 మండలాలకు గాను 24మండలాల్లో ఒక్క చినుకు కూడా రాలలేదు. మిగిలిన ఎస్‌.కోట మండలంలో 0.1 మి.మీ, కొత్తవలసలో 0.4మి.మీ, సంతకవిటిలో 72.మి.మీ చొప్పున మాత్రమే వర్షం కురిసింది. సీజన్‌ మొత్తంగా (జూన్‌ 1 నుంచి ఇప్పటి వరకు) సంతకవిటి, మెరకముడిదాం, మెంటాడ, డెంకాడ మండలాల్లో లోటు వర్షపాతం నమోదైంది. బాడంగిలో కేవలం 22 మి.మీ. అధికంగా వర్షం కురిసింది. మిగిలిన మండలాల్లో సాధారణ వర్షపాతం నమోదైనప్పటికి మొత్తం 130రోజులకు గాను కేవలం 61రోజులు మాత్రమే వర్షం కురవడంతో చెరువులు పెద్దగా నిండలేదు. మిగిలిన రోజుల్లో తీవ్రమైన ఎండలు కాయడంతో చెరువుల్లో నీరు కూడా పూర్తిస్థాయిలో లేని పరిస్థితి దాపురించింది. ఈనేపథ్యంలో అత్యంత కీలకమైన పొట్టదశలోను, గింజకట్టే దశలోనూ ఉన్న వరి ఎండిపోతోంది. గుర్ల మండలంలో సుమారు 9920 ఎకరాల్లో వరి సాగైంది. ఇంతకు మునుపులా గడిగెడ్డ ద్వారా తోటపల్లి నీరు అందడం లేదు. దీనికితోడు చెరువుల్లోనూ పెద్దగా నీరు లేకపోవడంతో పోలాయవలస, గుర్ల, కొండగండ్రేడు, ఎస్‌ఎస్‌ఆర్‌పేట, గుర్ల తదితర గ్రామాల్లో పంటలు ఎండిపోతున్నాయి. ఈ మండలంలో ఇప్పటికే సగానికి సగం వరి పంట ఎండిపోయినట్టుగా రైతులు చెబుతున్నారు. అటు డెంకాడ మండలంలోని డెంకాడ, గుణుపూర్‌పేట, తాళ్లవలస, మోపాడ, జొన్నాడు, అక్కవరం, రఘుమండ తదితర గ్రామాల్లో వరి పూర్తిగా ఎండిపోయింది. ఎండిన వరిని బతికించుకునేందుకు అవకాశం ఉన్నచోట్ల బావులు, చెరువుల వద్ద కిరోసిన్‌ మోటార్లు ద్వారా నీరు పెడుతున్నారు. ఇంజన్ల ద్వారా నీరు సరఫరా చేయడం వల్ల అదనంగా వేలాది రూపాయలు పెట్టుబడి పెరుగుతోందని గుణుపూరుపేటకు చెందిన వరి రైతు పైల దుర్గారావు ప్రజాశక్తి ఎదుట ఆవేదన వ్యక్తం చేశాడు. అటు తెర్లాం మండలం టెక్కలివలస, పెరుమాలి, చిన్నపాలవలస గ్రామాల పరిధిలోనూ నీరులేక దుర్భిక్ష పరిస్థితులు కనిపిస్తున్నాయి. వరి ఎండకు మలమలా మూడిపోతోంది. కొన్ని చోట్ల సాగు భూము బీటలువారుతోంది.
అటు పార్వతీపురం మన్యం జిల్లాలో అన్ని పంటలూ కలిపి సుమారు 2.20లక్షల ఎకరాల్లో సాగవుతున్నాయి. ఇందులో అత్యధికంగా వరి 1.15లక్షల ఎకరాల్లో ఎకరాల్లో సాగవుతోంది. గత 13రోజుల్లో 63.2 మి.మీ లోటు వర్షపాతంలో నమోదైంది. వీరఘట్టం, జిఎల్‌పురం, కురుపాం, కొమరాడ మండల్లాల్లో వర్షపులోటు ఉంది. సీజన్‌ మొత్తంగా పరిశీలిస్తే ఈ జిల్లాలోనూ జూన్‌, ఆగస్టులో వర్షం తక్కువగానే పడింది. ప్రస్తుతం కొమరాడ, పార్వతీపురం, మక్కువ తదితర మండలాల్లో పంట పొలాలు బీటలు వారుతున్నాయి. మరోవైపు ఇటీవల ఎండ తీవ్రత కూడా ఎక్కువగా ఉండడంతో రైతులు ఆందోళన చెందుతున్నారు. ఎకరా వరికి రూ.30వేల నుంచి రూ.40వేల వరకు పెట్టుబడులు పెట్టేశామని, ప్రస్తుతం వర్షాలు పడకపోతే మన్నైపోతామని ఆవేదన వ్యక్తం చేస్తున్నారు.
వర్షం కురవకపోతే అప్పుల ఊబే
చేను సరిగ్గా పొట్టదశలో ఉంది. ఈ సమయంలోనే తగినంత నీరుతోపాటు చల్లటివాతావరణం అవసరం. ప్రస్తుతం నీరు లేదు సరికదా తీవ్రమైన ఎండ, వడగాల్పులు ఉన్నాయి. ఈనేపథ్యంలో సాగుచేస్తున్న రెండెకరాల పొలం పూర్తిగా ఎండిపోయింది. అవకాశ ఉన్నచోట ఇంజిన్లతో నీరుపెడుతున్నాం. నీరు లేనిచోట అంతే సంగతులు. ఇదే పరిస్థితి మరికొద్ది రోజులు ఉంటే పంట నాశనమైనట్టే. అప్పుల ఊబిలో కూరుకుపోతామని భయం వెంటాడుతోంది.
జమ్ము రామకృష,్ణ వరి రైతు
తెట్టంగి గ్రామం, గుర్ల మండలం
