ప్రజాశక్తి-నెల్లిమర్ల : దేవస్ధానం భూముల రైతులకు సాగు హక్కు కల్పించాలని కౌలు రైతు సంఘం రాష్ట్ర ప్రధాన కార్యదర్శి మాగుంట హరి బాబు, రైతు సంఘం రాష్ట్ర ఉపాధ్యక్షులు మర్రాపు సూర్య నారాయణ డిమాండ్‌ చేశారు. గురువారం రాత్రి తంగుడిబిల్లి గ్రామంలో దేవాదాయ భూముల హక్కు దారుల సంఘం ఆధ్వర్యంలో రైతులతో సమావేశం జరిగింది. ఈ సమావేశంలో నాయకులు మాట్లాడుతూ రామతీర్థం రామస్వామిదేవస్థానం పరిధిలో వివిధ గ్రామాలకు చెందిన రైతుల ఆధీనంలో గల భూములకు పూర్తి సాగు హక్కు కల్పించాలని డిమాండ్‌ చేశారు. రైతులకు ఈ క్రాప్‌ , రుణాలు, రైతుభరోసా, తదితర పథకాలు వర్తింపు చేయాలని, సమగ్ర భూ సర్వేలో భూ హక్కులు ఇవ్వాలని డిమాండ్‌ చేశారు. కాగా రైతులు భూమి శిస్తు లు మాత్రమ దేవస్థానానికి చెల్లిస్తారని చెప్పారు. సమావేశంలో రైతు సంఘం జిల్లా కార్యదర్శి బి రాంబాబు, దేవాదాయ శాఖ భూముల జిల్లా కమిటీ అధ్యక్షులు కురిమినేని వెంకట రమణ తదితరులు పాల్గొన్నారు.
