ప్రజాశక్తి-విజయనగరంకోట : వైసిపి పాలకులు చట్టాలను చుట్టాలుగా మార్చేశారని టిడిపి పొలిట్‌బ్యూరోసభ్యులు పి.అశోక్‌గజపతిరాజు అన్నారు. శనివారం చంద్రబాబు నాయుడు అరెస్టును ఖండిస్తూ 'బాబుతో నేను' కార్యక్రమంలో భాగంగా ప్రజలు స్వచ్చందంగా సంతకాలు చేసిన ఫ్లెక్సీలను పార్టీ కార్యాలయంలో ప్రదర్శించారు. వాటిని అశోక్‌ గజపతిరాజు తిలకించారు.అనంతరం విలేకర్లతో మాట్లాడుతూ స్వచ్ఛందంగా సంతకాలు చేసి మద్దతు తెలిపిన ప్రజలకు ధన్యవాదాలు తెలిపారు. చంద్రబాబు జైలులో అనారోగ్యంతో బాధపడుతున్నా ఆస్పత్రికి తరలించకపోవడం అన్యాయమని అన్నారు. చంద్రబాబు నేరం చేశారా అని వెతకడానికి నెల రోజులు చాల లేదని అన్నారు. దేశంలోను, రాష్ట్రంలోను రాజ్యాంగం అసలు అమలవుతుందా? చట్టాలు ఉన్నాయా? అని ప్రశ్నించారు. అనారోగ్యానికి గురయ్యారని చెబితే బరువుపై కామెంట్‌ చేస్తున్నారని అన్నారు. 16 నెలలు జైల్లో ఉండి బెయిల్‌పై వచ్చిన వారు అధికారాన్ని దుర్వనియోగం చేస్తున్నారని దుయ్యబట్టారు. కార్యక్రమంలో టిడిపి జిల్లా ప్రధాన కార్యదర్శి ఐవిపి రాజు, పట్టణ అధ్యక్షులు ప్రసాదుల లక్ష్మీ వరప్రసాద్‌, కార్యదర్శి బంగారు బాబు, విజయనగరం మండల అధ్యక్షులు బొద్దల నర్సింగరావు, కార్యదర్శి గంటా పోలి నాయుడు, వేచలపు శ్రీనివాసరావు, కార్యాలయ కార్యదర్శి వర్మ రాజు, విజ్జపు ప్రసాద్‌, కనకల మురళీమోహన్‌, కంది మురళి నాయుడు, కర్రోతు వెంకట నర్సింగరావు తదితరులు పాల్గొన్నారు.
