ప్రజాశక్తి- బొబ్బిలి : పారాది వంతెన పాడైపోయిన తరువాత భారీ వాహనాలు పినపెంకి, కారాడ మీదుగా బొబ్బిలి వస్తున్నాయని దీని ద్వారా రోడ్డు పక్కల ఉన్న గ్రామాల ప్రజలు భయాందోళన చెందుతున్నారని సిపిఎం పట్టణ, మండల కార్యదర్శులు పి. శంకరరావు, ఎస్‌.గోపాలం అన్నారు. అధిక బరువు వల్ల కారాడ నుండి గొల్లపల్లి వరకు రోడ్లు అడుగు లోతుకు కూరుకుపోయి మొత్తం రోడ్డు పాడైపోయయన్నారు. ఆ రోడ్లను బుధవారం వారిద్దరూ పరిశీలించారు. కారాడ గ్రామం మధ్యలో రోడ్డు చాలా పెద్ద గొయ్యి ఏర్పడిందని రోడ్డు పక్క ఇల్లులు ఎప్పుడు ఏం జరుగుతుందోనని ఆందోళన వ్యక్తం చేస్తున్నారని చెప్పారు. ప్రభుత్వం నిర్లక్ష్యం కారణంగా పారాది కొత్త బ్రిడ్జి నిర్మించకపోవడం ఈ దుస్థితి ఏర్పడిందన్నారు. ఈ గ్రామాలతో పాటు బొబ్బిలిలో పూల్‌బాగ్‌ రోడ్డు, గొల్లపల్లి రోడ్డులో ఎప్పుడు ఏ ప్రమాదం జరుగుతుందోనని ప్రజలు భయపడుతున్నారన్నారు. దుమ్ము, ధూళి విపరీతంగా పెరిగి అనారోగ్యం పాలు అవుతున్నారన్నారు. పారాది కొత్త బ్రిడ్జి నిర్మాణానికి ప్రభుత్వం వెంటనే చర్యలు చేపట్టాలని డిమాండ్‌ చేశారు. ఉమ్ము తడి పనులు మాని ప్రజల ప్రాణాలతో చెలగాటం ఆడొద్దని హెచ్చరించారు.
