ప్రజాశక్తి-విజయనగరం : జర్నలిస్టులపై దాడులను, బెదిరింపులను సహించబోమని జర్నలిస్టులు హెచ్చరించారు. రెండు రోజుల క్రితం టిడిపిపై విశ్లేషణాత్మక కథనం రాసిన ఆంధ్రప్రభ స్టాఫ్‌ రిపోర్టర్‌ బిజిఆర్‌ పాత్రోను టిడిపి నాయకులు బెదిరించడాన్ని నిరసిస్తూ గురువారం కలెక్టరేట్‌ గాంధీ విగ్రహం వద్ద జర్నలిస్టులు నిరసన తెలిపారు. అనంతరం ఎస్‌పి కార్యాలయానికి వెళ్లి ఎఎస్‌పికి ఫిర్యాదు చేశారు. ఇటీవల కాలంలో పలువురు రాజకీయపార్టీ నాయకులు, కార్యకర్తలు దౌర్జన్యానికి, దాడికి పాల్పడుతున్న ఘటనలు చోటు చేసుకుంటు న్నాయని తెలిపారు. టిడిపి పై కథనం రాసిన స్టాఫ్‌ రిపోర్టర్‌పై టిడిపికి చెందిన భరత్‌, గంటా రవి తో పాటు మరో టిడిపి కార్యకర్త దౌర్జన్యానికి దిగారని తెలిపారు. టిడిపికి వ్యతిరేకంగా వార్తలు వస్తే చూస్తూ ఊరుకోమని, అంతు చూస్తామంటూ హెచ్చరించారని వివరించారు. ప్రస్తుత రాజకీయ పరిస్థితులు, మరికొద్ది నెలల్లో రాష్ట్రంలో జరిగనున్న ఎన్నికల నేపథ్యంలో జర్నలిస్టులపై మరిన్ని దాడులు జరిగే అవకాశం స్పష్టంగా కనిపిస్తుందని, కాబట్టి జర్నలిస్టులపై దాడులు జరగకుండా రక్షణ కల్పించి, దాడులకు పాల్పడుతున్న వ్యక్తులపై తమ చర్యలు తీసుకోవాలని కోరారు. కార్యక్రమంలో జర్నలిస్టుల ప్రతినిధులు కె.రమేష్‌నాయుడు, జి.కోటేశ్వరరావు, ఎంఎంఎల్‌ నాయుడు, ఎ.సత్యనారాయణ, పి.అప్పారావు, శివప్రసాద్‌ తదితరులు పాల్గొన్నారు.
