ప్రజాశక్తి-విజయనగరం : బాల్యవివాహాలను పూర్తిగా నిర్మూలించి, బాల్య వివాహ రహిత రాష్ట్రాన్ని రూపొందిద్దామని పలువురు వక్తలు పిలుపునిచ్చారు. బాల్య వివాహాల వల్ల కలిగే అనర్ధాలను వివరిస్తూ స్థానిక కోట జంక్షన్‌ నుంచి టిటిడి కళ్యాణ మండపం వరకు సోమవారం సాయంత్రం జిల్లా స్త్రీ శిశు సంక్షేమ శాఖ, కైలాస్‌ సత్యార్థి ఫౌండేషన్‌ ఆధ్వర్యంలో కొవ్వొత్తుల ఈ ర్యాలీ జరిగింది. కార్యక్రమంలో డిఆర్‌డిఎ పీడీ ఎ.కళ్యాణ చక్రవర్తి మాట్లాడుతూ బాల్య వివాహా రహితంగా, మన సమాజాన్ని రూపొందించాల్సిన అవసరం ఉందన్నారు. ప్రతి ఒక్కరూ తమ కుటుంబంలో బాల్యవివాహాలను చేయబోమని నిర్ణయం తీసుకోవాల్సిన అవసరం ఉందని అన్నారు.
ఐసిడిఎస్‌ పీడీ బి.శాంతకుమారి మాట్లాడుతూ ఎక్కడైనా బాల్య వివాహం జరుగుతున్నట్లు సమాచారం తెలిస్తే, అధికారులకు ఆ విషయాన్ని తెలియజేసి బాల్య వివాహాన్ని అడ్డుకోవాలని పిలుపునిచ్చారు. కార్యక్రమంలో బాలల హక్కుల కమిషన్‌ జిల్లా చైర్మన్‌ హిమబిందు, డిఆర్‌డిఎ ఎపిడి సావిత్రి, కైలాస్‌ సత్యార్థి ఫౌండేషన్‌ జిల్లా కోఆర్డినేటర్‌ ఝాన్సీ రాణి, వివిధ శాఖల అధికారులు, స్వచ్ఛంద సంస్థల ప్రతినిధులు, మహిళా సంఘాల సభ్యులు పాల్గొన్నారు.
చైతన్యంతోనే మార్పు సాధ్యం : కలెక్టర్‌
చిన్న వయసులో జరిగే వివాహాల వల్ల సామాజికంగా, ఆర్ధికంగా, ఆరోగ్య పరంగా కలిగే నష్టాలపై సమాజంలో చైతన్యం తీసుకువచ్చి ప్రజల్లో ఆలోచించేలా చేసినపుడే వీటిని నిరోధించడం సాధ్యమవుతుందని కలెక్టర్‌ ఎస్‌.నాగలక్ష్మి అన్నారు. బాల్యవివాహాలు ఎక్కువగా జరుగుతున్న జిల్లాల్లో మన జిల్లా కూడా వుందని, వీటిని నిరోధించేందుకు ప్రభుత్వంతోపాటు స్వచ్ఛంద సంస్థల తోడ్పాటు కూడా అవసరమని పేర్కొన్నారు. కైలాష్‌ సత్యర్ధి ఫౌండేషన్‌ చేపట్టిన బాల్యవివాహాల రహిత ఆంధ్రప్రదేశ్‌ ఉద్యమంలో భాగంగా బాల్యవివాహాలపై రూపొందించిన పోస్టర్లను కలెక్టర్‌ కార్యాలయ ఆడిటోరియంలో ఆవిష్కరించారు. ఈ సందర్బంగా మాట్లాడుతూ రానున్న రోజుల్లో జిల్లాలో యీ సంస్థ చేపట్టే కార్యక్రమాలకు ప్రభుత్వ యంత్రాంగం తోడ్పాటు అందిస్తుందన్నారు. ఈ సందర్భంగా గ్రీవెన్స్‌ కార్యక్రమంలో జిల్లా అధికారులతో కలెక్టర్‌ బాల్య వివాహాల నిర్మూలన ప్రతిజ్ఞ చేయించారు. 2030 నాటికి రాష్ట్రంలో బాల్యవివాహాలు లేకుండా చేయడమే కైలాష్‌ సత్యర్ధి ఫౌండేషన్‌ లక్ష్యమని సంస్థ జిల్లా కో-ఆర్డినేటర్‌ ఝాన్సీరాణి చెప్పారు. జెసి మయూర్‌ అశోక్‌, డిఆర్‌డిఎ ప్రాజెక్టు డైరక్టర్‌ కళ్యాణ్‌ చక్రవర్తి, ఐసిడిఎస్‌ పీడీ శాంతకుమారి తదితరులు పాల్గొన్నారు.
