ప్రజాశక్తి- వేపాడ : ఎంతో ప్రతిష్టాత్మకంగా ప్రవేశపెట్టిన, మోడల్‌ స్కూల్లో హాస్టల్‌ సదుపాయం లేకపోవడం అన్యాయమని ఎపి రైతు సంఘం జిల్లా ఉపాధ్యక్షులు చల్లా జగన్‌, వ్యవసాయ కార్మిక సంఘం జిల్లా అధ్యక్షులు జి అప్పారావు, సిఐటియు జిల్లా కార్యదర్శి మద్దెల రమణ ఆవేదన వ్యక్తం చేశారు. బుధవారం మండలంలోని బక్కునాయుడుపేట మోడల్‌ స్కూల్‌ను, అనుబంధ హాస్టలను వారు పరిశీలించారు. అనంతరం చల్లా జగన్‌ మాట్లాడుతూ మండలం నలుమూలల నుంచి సుమారు 650 మంది మోడల్‌ స్కూల్లో చదువుకునేందుకు నానా ప్రయాసలతో వెళుతున్నారని, అందులో బాలికలే 350 మంది ఉన్నారని తెలిపారు. ప్రతిరోజు బాలికలను తల్లిదండ్రులు మోడల్‌ స్కూల్‌లకు దించలేక, వయసు వచ్చిన ఆడపిల్లను పంపించే ఆధారం గానీ తోవ గాని లేక తల్లిదండ్రులతో పాటు అమ్మాయిలు అష్టకష్టాలు పడుతున్నారన్నారు. మోడల్‌ స్కూల్‌ ఏర్పాటు చేసిన కొన్ని సంవత్సరాలకు 100 మందికి మాత్రమే హాస్టల్‌ అని షరతలు పెట్టారని, మిగిలిన 250 మంది బాలికల పరిస్థితి ఏంటని ప్రశ్నించారు. మోడల్‌ స్కూల్లో చదువుతున్న 650 మందికి హాస్టల్‌ సౌకర్య కల్పించాలని, తక్షణమే స్కూల్లో చదువుతున్న ఆడపిల్లలందకీ హాస్టల్‌ సౌకర్యం కల్పించాలని డిమాండ్‌ చేశారు. వెంటనే ప్రభుత్వాలు, అధికారులు స్పందించి మోడల్‌ స్కూల్‌లలో అన్ని వసతులతో హాస్టల్‌ సౌకర్యం కల్పించి బాలికల చదువుకోసం అన్ని రకాలగా ప్రభుత్వం ఆదుకోవాలని కోరారు.
