ప్రజాశక్తి-విజయనగరం : బాలికల బంగారు భవిష్యత్తుకు, భద్రతకు భరోసా కల్పిద్దామని బాలల హక్కుల పరిరక్షణ కమిషన్‌ చైర్మన్‌ కేసలి అప్పారావు తెలిపారుక. అంతర్జాతీయ బాలికా దినోత్సవం సందర్భంగా జిల్లా మహిళా శిశు సంక్షేమ శాఖ ఆధ్వర్యంలో విజయనగరంలో అన్ని శాఖల సమన్వయంతో ర్యాలీ, మానవహారం నిర్వహించారు. ఈ సందర్భంగా అప్పారావు మాట్లాడుతూ బాలికలకు పూర్తి స్థాయిలో విద్య, ఆరోగ్యానికి ప్రభుత్వం అధిక నిధులు మంజూరు చేస్తుందన్నారు. తద్వారా బాలికలు తమ ఉన్నత లక్ష్యాలను, శిఖరాలను చేరుకుంటారని తెలిపారు. సమాజంలో బాలికలను అన్ని రంగాలలో భాగస్వామ్యం చేసి వారి అభివృద్ధికి కృషి చేయాలని సూచించారు. బాలికలు అపరిచిత వ్యక్తులతో పరిచయం చేసుకోకూడదని, సామాజిక మాద్యమాలకు, మొబైల్‌ ఫోన్లకు దూరంగా ఉండాలని కోరారు. ఏర్పరచుకొన్న లక్ష్యాలను సాధించడానికి నిరంతరం కృషి చేయాలని, నాయకత్వ లక్షణాలను అలవర్చుకోవాలని సూచించారు. తల్లిదండ్రులు బాలికలతో నిరంతరం చర్చిస్తూ ఉండాలని, వారి బంగారు భవిష్యత్తుకు బాటలు వేయాలని సూచించారు. ఈ కార్యక్రమంలో జిల్లా ఇంటర్‌ మీడియట్‌ బోర్డ్‌ ప్రాంతీయ పర్యవేక్షణ అధికారి మజ్జి ఆదినారాయణ, జిల్లా బాలల సంరక్షణ విభాగం సిబ్బంది కెంగువ జయలక్ష్మి, యాళ్ల నాగరాజు, వెన్నెల సంధ్య, రెడ్డి సరస్వతి, తవిటినాయుడు, వెంకటరావు, అప్పారావు, వన్‌స్టాప్‌ సిబ్బంది సాయి విజయలక్ష్మి, చైల్డ్‌ లైన్‌ సిబ్బంది అరుణ్‌, అనిల్‌, మీనా, గౌరీ పాల్గొన్నారు.
బాల్య వివాహాల నిర్మూలనకు సమిష్టి కృషి
విజయనగరం : జిల్లాలో తక్కువ వయస్సులోనే వివాహాల సమస్య అధికంగా ఉందని, దీనిని నివారించేందుకు ప్రభుత్వం, స్వచ్ఛంద సంస్థల ఆధ్వర్యంలో ప్రజల్లో పెద్ద ఎత్తున అవగాహన కార్యక్రమాలు చేపట్టాల్సి ఉందని కలెక్టర్‌ ఎస్‌.నాగలక్ష్మి తెలిపారు. బాల్య వివాహాలపై కైలాస్‌ సత్యర్థి ఫౌండేషన్‌కు చెందిన భువన్‌ రిభు రచించిన వెన్‌ చిల్డ్రన్‌ హేవ్‌ చిల్డ్రన్‌ అనే పుస్తకాన్ని కలెక్టర్‌ బుధవారం తన ఛాంబర్‌లో ఆవిష్కరించారు. ఈ సందర్భంగా బాల్య వివాహాల నిరోధానికి కైలాస్‌ సత్యర్థి ఫౌండేషన్‌ చేస్తున్న కృషిని ప్రశంసించారు. కార్యక్రమంలో డిఆర్‌డిఎ పీడీ కళ్యాణ చక్రవర్తి, ఐసిడిఎస్‌ పీడీ శాంతకుమారి, బెజ్జిపురం యూత్‌క్లబ్‌ డైరెక్టర్‌ ఎం.ప్రసాదరావు, కోశాధికారి జి.అప్పలనాయుడు, ఫౌండేషన్‌ జిల్లా సమన్వయకర్త జి.ఝాన్సీరాణి, స్కిల్‌ డెవలప్‌మెంట్‌ కార్పొరేషన్‌ జిల్లా మేనేజర్‌ గోవిందరావు పాల్గొన్నారు.
విజయనగరం టౌన్‌ : మహిళలను సంపూర్ణ ఆరోగ్యవంతులుగా తీర్చిదిద్దే బాధ్యతను ప్రతిఒక్కరూ తీసుకోవాలని కమిషనర్‌ ఆర్‌.శ్రీరాముల నాయుడు చెప్పారు. ఈ మేరకు బుధవారం ఇప్పిలి వీధిలోని 15వ నెంబర్‌ సచివాలయంలో మహిళల ఆరోగ్యం పట్ల సిబ్బంది తీసుకుంటున్న చర్యలు, నమోదు చేస్తున్న సర్వే వివరాలను ఆయన పరిశీలించారు. అప్పుడే పుట్టిన బిడ్డ నుండి నుండి ఐదేళ్లలోపు పిల్లల బరువు వివరాలను తెలుసుకోవాలని అంగన్వాడి, ఎఎన్‌ఎంలు, సచివాలయ సిబ్బందికి సూచించారు. సచివాలయ పరిధిలో ఓ మహిళ రక్తహీనతతో బాధపడుతుండడం గమనించామన్నారు. అవసరమైన వైద్య పరీక్షలు నిర్వహించి, చర్యలకు వైద్యులకు సిఫార్సు చేస్తామన్నారు.
బాలికా సంరక్షణ కోసం ఉద్యమం
విజయనగరం టౌన్‌ : బాలికల సంరక్షణ కోసం జెవివి కృషి చేస్తున్నదని సమతా రాష్ట్ర కన్వీనర్‌ నిర్మల, జెవివి జిల్లా అధ్యక్షులు ఎంవిఎన్‌ వెంకటరావు తెలిపారు. జెవివి సమతా విభాగం ఆధ్వర్యాన విజయనగరం ఎస్‌టి బాలికల హాస్టల్లో ఏర్పాటుచేసిన సభలో వారు మాట్లాడారు. బాలికలకు రక్షణ కల్పించడంలో ప్రభుత్వాలు విఫలమవుతున్నాయని చెప్పారు. మహిళా ఆరోగ్యం, విద్య, పౌష్టికాహారం అందించడానికి కేంద్ర, రాష్ట్ర ప్రభుత్వాలు కృషి చేయాలన్నారు. తొలుత జెవివి జిల్లా నాయకులు అచ్చిబాబు సైన్సు మేజిక్‌ షో నిర్వహించి, ఆకట్టుకున్నారు. ఈ కార్యక్రమంలో హెచ్‌ఎం ఉమాలక్ష్మి, తదితరులు పాల్గొన్నారు.
