ప్రజాశక్తి-విజయనగరం కోట : ఆర్‌టిసిలో పనిచేస్తున్న వివిధ తరగతి ఉద్యోగులు, కార్మికుల సమస్యలను పరిష్కరించాలని ఆర్‌టిసి కాంట్రాక్ట్‌ ఔట్‌ సోర్సింగ్‌ వర్కర్స్‌ యూనియన్‌ (సిఐటియు) రాష్ట్ర అధ్యక్షులు సిహెచ్‌ సుందరయ్య, ఎస్‌డబ్ల్యుఎఫ్‌ రాష్ట్ర కార్యదర్శి వి.రాములు డిమాండ్‌ చేశారు. అవుట్‌ సోర్సింగ్‌ కార్మికులకు థర్డ్‌ పార్టీ విధానాన్ని రద్దు చేయాలని అన్నారు. మంగళవారం ఆర్‌టిసి కాంప్లెక్సు సమీపాన యుటిఎఫ్‌ కార్యాలయంలో ఆర్‌టిసి ఔట్‌ సోర్సింగ్‌ ఉద్యోగుల సమావేశం జరిగింది. ఈ సందర్భంగా సుందరయ్య మాట్లాడుతూ ఆర్‌టిసి సంఘాలతో అనేక దఫాలుగా చర్చించి ఉద్యోగ భద్రత కోసం రూపొందించిన 1/2019 సర్క్యులర్‌ ను విధిగా అమలు చేసేలా కిందిస్థాయి అధికారులకు నిర్దిష్ట మైన ఆదేశాలు ఇవ్వాలని డిమాండ్‌ చేశారు. ఆర్‌టిసిలో అసంఘటిత కార్మికులుగా వున్న 16వేల మంది ఔట్‌ సోర్సింగ్‌ కార్మికులు, అద్దె బస్సు డ్రైవర్లు, ఆన్‌ కాల్‌ డ్రైవర్లకు గుర్తింపు కార్డులు ఇవ్వాలని, సమాన పనికి సమాన వేతనం, టైం స్కేలు అమలు చేయాలని, అద్దె బస్సు డ్రైవర్లకు ప్రావిడెంట్‌ ఫండ్‌, ఇఎస్‌ఐ సౌకర్యం కల్పించాలని డిమాండ్‌ చేశారు. ఇన్సూరెన్స్‌ పథకాలను, వారాంతపు సెలవులను విధిగా అమలు చేయాలన్నారు. టైం స్కేల్‌ అమలు కోసం పోరాడాలని పిలుపునిచ్చారు, నవంబర్‌ 19న విజయనగరంలో జోనల్‌ స్థాయి ఆర్‌టిసి కాంట్రాక్ట్‌ ఔట్‌ సోర్సింగ్‌ కార్మికుల సదస్సును జరపాలని సమావేశం ఏకగ్రీవంగా తీర్మానించినట్లు యూనియన్‌ అధ్యక్షులు ఎ.జగన్మోహన్‌రావు తెలిపారు. సమావేశంలో సిఐటియు జిల్లా ప్రధాన కార్యదర్శి కె.సురేష్‌ పాల్గొన్నారు.
