ప్రజాశక్తి-విజయనగరం టౌన్‌ : ప్రజల ఆరోగ్య పరిరక్షణే ధ్యేయంగా ముఖ్యమంత్రి వైఎస్‌ జగన్మోహన్‌ రెడ్డి అనేక సంస్కరణలు తీసుకొస్తున్నారని డిప్యూటీ స్పీకర్‌ కోలగట్ల వీరభద్ర స్వామి పేర్కొన్నారు. మంగళవారం నగరంలోని కంటోన్మెంట్‌ హైస్కూలు ప్రాంతంలో నిర్వహించిన జగనన్న ఆరోగ్య సురక్ష కార్యక్రమాన్ని ఆయన ప్రారంభించారు. 47, 48, 49 సచివాలయాల పరిధిలో ప్రజలు వైద్య శిబిరానికి చేరుకున్నారు. అవసరమైన వారికి వైద్య పరీక్షలు ఉచితంగా అందజేసారు. ఈ సందర్భంగా జోనల్‌ ఇన్చార్జి డాక్టర్‌ వి ఎస్‌ ప్రసాద్‌ మాట్లాడుతూ రాష్ట్ర ప్రభుత్వం విద్యా, వైద్యానికి అధిక ప్రాధాన్యతనిస్తోందన్నారు. నగరంలో ఏడు ప్రాథమిక ఆరోగ్య కేంద్రాలు ఏర్పాటు చేయడం ద్వారా ప్రజల ఆరోగ్యం పట్ల ముఖ్యమంత్రికి ఉన్న చిత్తశుద్ధి రుజువు చేస్తుందన్నారు. 15వ తేదీ వరకు వైద్య శిబిరాలు ఏర్పాటు చేసి ఉచిత వైద్య చికిత్సలు, వైద్య పరీక్షలు నిర్వహించి అవసరమైన వారికి ఉచితంగా మందులను పంపిణీ చేయనున్నట్లు చెప్పారు. కార్యక్రమంలో కార్పొరేటర్‌ వింత ప్రభాకర్‌ రెడ్డి, కమీషనర్‌ ఆర్‌ శ్రీరాములు నాయుడు, సహాయ కమిషనర్‌ ప్రసాదరావు, జోనల్‌ ఇన్చార్జి దూబే, డివిజన్ల కార్పొరేటర్లు సుంకరి నారాయణస్వామి, ధనలక్ష్మి, కోఆప్షన్‌ సభ్యులు రహీం, ప్రజారోగ్య అధికారి డాక్టర్‌ కొండపల్లి సాంబమూర్తి తదితరులు పాల్గొన్నారు.
రహదారులు ప్రారంభం
నగరంలోని 9, 20వ డివిజన్లలో సుంకరవీధి, శాంతినగర్‌లో నిర్మించిన రహదారులను డిప్యూటీ స్పీకర్‌ కోలగట్ల వీరభద్ర స్వామి మంగళవారం ప్రారంభించారు. గడపగడపకు మన ప్రభుత్వ కార్యక్రమంలో పర్యటించిన సందర్భంలో స్థానికుల వినతి మేరకు రహదారి ఏర్పాటుకు కోలగట్ల హామీ ఇచ్చారు. పనులు పూర్తి కావడంతో రహదారులను ప్రారంభించి ప్రజా వినియోగంలోకి తీసుకువచ్చారు. ఈ సందర్భంగా మేయర్‌ విజయలక్ష్మి మాట్లాడుతూ నగరం అన్ని రంగాలలో అభివృద్ధి చెందుతుందన్నారు. కార్యక్రమంలో మండల పార్టీ అధ్యక్షుడు నడిపేన శ్రీనివాసరావు, స్థానిక కార్పొరేటర్‌ సయ్యద్‌ గౌస్‌, జోనల్‌ ఇన్చార్జి అల్లు చాణిక్య, వైసిపి నాయకులు నాయన మహేష్‌ తదితరులు పాల్గొన్నారు.
