ప్రజాశక్తి- బొండపల్లి : స్థానిక పిహెచ్‌సి పరిధిలోని బొండపల్లి ఆశా కార్యకర్తగా పనిచేస్తున్న కెల్ల లక్ష్మీ(45) అనారో గ్యంతో బధవారం మరణించారు. ఆమె మృతికి ఆశావర్కర్స్‌ యూనియన్‌ జిల్లా కమిటీ సంతాపాన్ని తెలిపింది. ఆమె కుటుంబానికి ప్రగాఢ సానుభూతిని తెలియజేసింది. ఆమె మృతదేహాన్ని సందర్శించిన యూనియన్‌ నాయకులు నివాళలు అర్పించారు. ఈ సందర్భంగా యూనియన్‌ జిల్లా ప్రదాన కార్యదర్శి బొత్స సుధారాణి మాట్లాడుతూ గత 17 సంవత్సరాలుగా ఆశావర్కర్‌గా పనిచేస్తూ గ్రామంలో ప్రజలకు వైద్య సేవలు అందించడంలో కీలకపాత్ర పోషించిన లక్ష్మీ మరణించడం దురదృష్టకరమన్నారు. పని ఒత్తిడి వల్ల రాష్ట్రంలో అనేక మంది ఆశావర్కర్స్‌ అనారోగ్యానికి గురై మరణిస్తున్నారన్నారు. వీరికి ప్రభుత్వం పైసా కూడా ఇవ్వకపోవటం వల్ల వారి కుటుంబాలు రోడ్డున పడుతున్నాయని వారికి రూ.10లక్షలు నష్ట పరిహారం, కుటుంబంలో ఒకరికి ఉద్యోగం ఇచ్చి ఆదుకోవాలని డిమాండ్‌ చేశారు. పరామర్శించిన వారిలో యూనియన్‌ నాయకులు సుధారాణి, గణపతమ్మ, బంగారమ్మ, రామయ్యమ్మ, పైడిరాజు, బొండపల్లి ఆశా వర్కర్లు ఉన్నారు.
