ఆంధ్రుల హక్కు

నిర్వాసితుల త్యాగఫలం
నీరుకారి పోతోంది.
విశాఖ ఉక్కుపై ప్రయివేటు
ఉక్కుపాదం నీలినీడ ముసురుతోంది.
బలిదానాలతో సాధించుకొన్న
'నవరత్న' హోదాను బలిపీఠం
ఎక్కించేందుకు సర్వత్రా
రంగం సిద్ధమవుతోంది!
ఆంధ్రుల ఐక్యత ఉక్కులా
గట్టి పడాల్సిన సమయం
నేడు రానే వచ్చింది.
రాజకీయాలు పక్కన పడేసి
కులమత భేదాలు మరచి
సమస్త ఆంధ్రజాతి వెల్లువెత్తాలింక
నాటి ఉద్యమం మళ్ళీ
ఉక్కు సంకల్పంతో తిరిగి పుట్టాలి
తెన్నేటి విశ్వనాథం కల..
తెలుగు జాతి పౌరుషాగ్ని
రగిలించిన పోరాటాల అల..
మళ్ళీ ఎగిసి పడాలి ఉవ్వెత్తున!
ఆంధ్రుల కీర్తికిరీటంలో ఈ
నవరత్నం మకుటాయమానమై
మెరవాలంటే మన ఐక్యతను
సమరశంఖంలో పోసి
దిక్కులు పిక్కటిల్లేలా పూరించాలి.
ఉక్కు మన జాతి హక్కని యావత్‌
భారతావనికి చాటి చెప్పాలి!
                             * భీమవరపు పురుషోత్తం, 9949800253