ప్రజాశక్తి-విజయనగరం టౌన్‌ : రాష్ట్ర ప్రజలందరికీ ఆరోగ్యాన్ని అందించడమే ముఖ్యమంత్రి లక్ష్యమని ఎస్‌టి కమిషన్‌ ఛైర్మన్‌ డాక్టర్‌ డివిజి శంకర్రావు అన్నారు. విజయనగరం మండలం కొండకరకాం గ్రామంలో జగనన్న ఆరోగ్య సురక్ష కార్యక్రమం సోమవారం నిర్వహించారు. కంటి పరీక్షలను నిర్వహించి, అవసరమైన వారికి కళ్లద్దాలను పంపిణీ చేశారు. కార్యక్రమంలో పాల్గొన్న డాక్టర్‌ డివిజి శంకర్రావు మాట్లాడుతూ, వైద్యం చాలా ఖరీదు అయిపోయిన ప్రస్తుత సమయంలో, ఇలాంటి వైద్య శిబిరాలు ప్రజలకు ఎంతో అవసరమని అన్నారు. ప్రాథమిక వైద్యం నుంచి స్పెషలిస్టు వైద్యం వరకూ గ్రామాల్లోనే అందిస్తూ, కొత్త చరిత్రను సష్టించారని అన్నారు. మండలానికి రెండు పిహెచ్‌సిలు, ప్రతీ పిహెచ్‌సికి ఇద్దరు డాక్టర్లును ఏర్పాటు చేసి, వైద్యాన్ని గ్రామీణ ప్రజల చెంతకు చేర్చారని చెప్పారు. జిల్లా వాసుల సుదీర్ఘ కలను నెరవేరుస్తూ ప్రభుత్వ వైద్య కళాశాలను ఏర్పాటు చేశారని అన్నారు. కొన్ని రకాల వ్యాధులను ఎంత త్వరగా గుర్తిస్తే అంతమంచిదని స్పష్టం చేశారు. ప్రభుత్వం ఈ అవకాశాన్ని సద్వినియోగం చేసుకొని, ఆరోగ్యవంతులు కావాలని డివిజి కోరారు. కార్యక్రమంలో ఎంపిపి మామిడి అప్పలనాయుడు, జిల్లా గిరిజన సంక్షేమాధికారి చంద్రశేఖర్‌, తాహశీల్దార్‌ కోరాడ శ్రీనివాసరావు, పార్టీ నాయకులు నడిపేన శ్రీనివాసరావు తదితరులు, మండల స్థాయి అధికారులు, వైద్య సిబ్బంది పాల్గొన్నారు.
మెరుగైన ఆరోగ్యమే సురక్ష లక్ష్యం
ప్రజలకు మెరుగైన ఆరోగ్యం కల్పించేందుకే రాష్ట్ర ప్రభుత్వం ఆరోగ్యసురక్ష కార్యక్రమాన్ని ఏర్పాటు చేసిందని డిప్యూటీ స్పీకర్‌ కోలగట్ల వీరభద్రస్వామి అన్నారు. సోమవారం స్థానిక బాబా మెట్టలో జరిగిన జగనన్న ఆరోగ్య సురక్ష కార్యక్రమంలో ఆయన పాల్గొన్నారు. ప్రజలకు అందిస్తున్న వైద్య సేవలు గురించి ఆరా తీశారు. అవసరమైన వారికి ఉచితంగా మందులు పంపిణీ చేశారు. పౌష్టికాహారం విలువలను వివరించే విధంగా స్త్రీ శిశు సంక్షేమ శాఖ ఆధ్వర్యంలో ప్రత్యేక స్టాల్స్‌ ఏర్పాటు చేశారు. ఈ సందర్భంగా మేయర్‌ విజయలక్ష్మి మాట్లాడుతూ నగరంలో ఇప్పటివరకు జరిగిన ఆరు శిబిరాల్లో సుమారు 4వేల మంది వైద్య సేవలు పొందారని అన్నారు. కార్యక్రమంలో కమిషనర్‌ ఆర్‌ శ్రీ రాముల నాయుడు, సహాయ కమిషనర్‌ ప్రసాదరావు, స్థానిక కార్పొరేటర్‌ గాదం మురళి, వైసిపి నాయకులు పాల్గొన్నారు.
