ప్రజాశక్తి- ఎచ్చెర్ల: ఎచెర్లలోని డాక్టర్‌ బి.ఆర్‌.అంబేద్కర్‌ విశ్వవిద్యాలయం క్యాంపస్‌ ఆవరణలో అంబేద్కర్‌ చైర్‌ను తక్షణమే నెలకొల్పాలని ఎచ్చెర్ల అసెంబ్లీ నియోజకవర్గ టిడిపి నాయకులు, ఉత్తరాంధ్ర టిడిపి శిక్షణా శిబిరం మాజీ డైరెక్టర్‌ కలిశెట్టి అప్పలనాయుడు కోరారు. ఎచ్చెర్ల హెడ్‌క్వార్టర్‌లోని డాక్టర్‌ బి.ఆర్‌.అంబేద్కర్‌ విశ్వవిద్యాలయం క్యాంపస్‌ ఆవరణలో అంబేద్కర్‌ చైర్‌ను నెలకొలపాలని కోరుతూ అంబేద్కర్‌ జాతర నిర్వాణ కమిటీ ఆధ్వర్యాన జాతా ర్యాలీని ఆదివారం నిర్వహించారు. ముందుగా స్థానిక దళితవాడలోని అంబేద్కర్‌ సామాజిక భవనం నుంచి ఆరంభమై ఇక్కడి డాక్టర్‌ బి.ఆర్‌.అంబేద్కర్‌ విశ్వవిద్యాలయం క్యాంపస్‌ ఆవరణ వరకు దళితులతో ర్యాలీ నిర్వహించారు. ఈ మేరకు డాక్టర్‌ బి.ఆర్‌ అంబేద్కర్‌ విశ్వవిద్యాలయం క్యాంపస్‌ ఆవరణలోని అంబేద్కర్‌ విగ్రహానికి దళిత సంఘాల నాయకులతో కలసి పూలమాలలు వేసి నివాళ్లర్పించారు. తప్పెట గుళ్లు, కోలాటం, డప్పు వాద్యాలతో ర్యాలీ నిర్వహించడంతో అందరినీ ఆకర్షించింది.
