ప్రజాశక్తి-విజయనగరం టౌన్‌ : బాడంగి మండలం ఆకులకట్ట అటవీ ప్రాంతంలో ఉన్న గిరినజనులకు రక్షణ కల్పించాలని, వారి నివాసాలను ధ్వంసం చేసిన అటవీ శాఖ అధికారులపై చర్యలు తీసుకోవాలని సిపిఎం బాడంగి మండల నాయకులు ఎ.సురేష్‌ డిమాండ్‌ చేశారు. మంగళవారం జిల్లా అటవీ శాఖ కార్యాలయం ఎదుట గిరిజనులతో కలిసి ధర్నా నిర్వహించారు. ఈ సందర్భంగా ఆయన మాట్లాడుతూ ఆకులకట్ట ప్రాంతంలో అనేక గిరిజన కుటుంబాలు జీవిస్తున్నాయని అన్నారు. నాలుగు నెలలు క్రితం నివాసాలు కోసం వేసుకున్న పాకలను అటవీ శాఖ అధికారులు ధ్వంసం చేసి అనేక ఇబ్బందులకు గురి చేశారన్నారు. అదే ప్రాంతంలో అటవీ భూమిని కొంతమంది గిరిజనేతర పెత్తందార్లు సాగు చేసుకుంటున్నప్పటికీ వారి పై ఎటువంటి చర్యలు అటవీ శాఖ అధికారులు తీసుకోవడం లేదన్నారు. అమాయకులైన గిరిజనులపై దౌర్జన్యం చేసి దాడి చేయడం,పాకలు తొలగించడం అన్యాయమన్నారు. గిరిజనులను ప్రతి రోజు బెదిరింపులకు పాల్పడుతున్న అటవీ శాఖ అధికారులు నుంచి రక్షణ కల్పించాలని కోరారు. ధర్నా లో గిరిజన నాయకులు కామయ్య, గిరిజనులు పాల్గొన్నారు.
