ప్రజాశక్తి-విజయనగరం టౌన్‌ : గరివిడి ప్రాంతంలోని అర్‌ఎంఎం అండ్‌ అర్‌బిఎస్‌, డిఎఫ్‌ఎన్‌ కంపెనీలో భాగంగా ఉన్న ఆక్స్‌డ్‌ ప్లాంట్‌ మూసివేత నిర్ణయాన్ని యాజమాన్యం వెనక్కి తీసుకోవాలని, మూసివేతకు జిల్లా అధికార యంత్రాంగం అనుమతులు ఇవ్వొద్దని కంపెనీ వర్కర్స్‌ అండ్‌ ఎంప్లాయిస్‌ యూనియన్‌ (సి ఐటియు) అధ్యక్షులు ఎ.గౌరినాయుడు, సిఐటియు జిల్లా నాయకులు టివి రమణ డిమాండ్‌ చేశారు. మంగళవారం కలెక్టరేట్‌ ఎదుట ఆ యూనియన్‌ ఆధ్వర్యాన ధర్నా చేపట్టారు. 25 ఏళ్లగా నడుస్తున్న ఆక్స్‌డ్‌ కంపెనీని ఉన్న పళంగా యాజమాన్యం మూసేయలని నిర్ణయించడం దారుణమన్నారు. 110 మంది కార్మికులు 25 ఏళ్లుగా పని చేస్తున్నారన్నారు. రక రకాల కారణాలు చెప్పి మూసేయాలని నిర్ణయానికి రావడం సరికాదన్నారు. మరో వైపు అదే యాజమాన్యానికి అదే ప్రాంతంలో ఫెర్రో ఎల్లాయిస్‌, రాధిక పామాయిల్‌ కంపెనీలు ఉన్నాయని, కార్మికులకు ఇతర కంపెనీలో పని కల్పించాలని కోరినా యాజమాన్యం ఉన్నపలంగా మూసేస్తామని నోటీసు ఇవ్వడం అన్యాయమన్నారు.కార్మికులు రోడ్డున పడేసే విధంగా యాజమాన్యం నిర్ణయాన్ని వెనక్కి తీసుకోవాలని, జిల్లా అధికార యంత్రాంగం కూడా మూసి వేసేందుకు అనుమతులు ఇవ్వొద్దని డిమాండ్‌ చేశారు. ధర్నాలో కె.లక్ష్మునాయుడు, ఎస్‌.చిరంజీవి, బి.అప్పలనాయుడు, తవుడు, సత్యం, అప్పారావు, ఎల్లయ్య, రాజు, ప్రసాద్‌, సూర్యనారాయణ, కార్మికులు పాల్గొన్నారు.
